تلنگانہ قائدین کی کردارکشی فاشسٹ طاقتوں کاایجنڈ ہ 

 رکن تلنگانہ قانون ساز کونسل کلواکنٹلہ کویتا کو انفورسمنٹ ڈائریکٹوریٹ کی جانب سے دہلی شراب اسکام معاملے میں نوٹس جاری کئے جانے کی جھوٹی خبر کو چند میڈیا چنیلز کی جانب سے نشر کئے جانے پر شدید رد عمل کا اظہار کرتے ہوئے کویتا نے سوشیل میڈیا کے مشہور پلیٹ فارم ٹوئیٹر پر ٹوئیٹ کرتے ہوئے بتایا کہ فاشسٹ طاقتوں کے بدنیتی پر مبنی پروپیگنڈے کا مقصدتلنگانہ قائدین کی کردارکشی اور عوام کی فلاح وبہبود سے انہیں روکنے کی ناکام کوششیں ہیں۔

انہوں نے ٹوئٹر پر اپنے احساسات کا اظہار کرتے ہوئے کہا کہ اقتدار کے بھوکے بی جے پی قائدین کاسادہ لوح عوام کے ذہنوں میں تلنگانہ قائدین کے خلاف زہربھرنے کا عمل مسلسل جاری ہے تاہم انہوں نے کہا کہ عوام سمجھدار ہیں اوروہ مرکزی قائدین کی ہر شاطرانہ چال پر گہرائی سے نظررکھے ہوئے ہیں۔

The media is being misled by the malicious propaganda of people sitting in Delhi. I request all the media houses to rather utilise your time in showing the truth.
To save some precious time of the TV viewers, I would like to clarify that I have not received any notice.

— Kavitha Kalvakuntla (@RaoKavitha) September 16, 2022

انہوں نے کہاکہ میڈیا جیسے حقائق کوآشکارکرنے والے شعبہ کوبھی مرکزی قائدین کی جانب سے گمراہ کیا جا رہا ہے۔ انہوں نے اس موقع پر میڈیا اداروں سے اپیل کی کہ وہ اپنا وقت سچ دکھانے کے لیے استعمال کریں۔انہوں نے بتایا کہ ٹی وی ناظرین کا کچھ قیمتی وقت بچانے کے لیے میں واضح کرنا چاہتی ہوں کہ مجھے کوئی ای ڈی کا نوٹس موصول نہیں ہوا ہے۔

واضح رہے کہ آج صبح ہی سے چند ٹی وی نیوز چینلوں پر یہ بتایا جارہا تھا کہ دہلی شراب معاملہ میں ای ڈی نے دختر وزیراعلیٰ و رکن تلنگانہ قانون ساز کونسل کو نوٹس روانہ کیا ہے۔رکن کونسل کویتا نے واضح طور پر بتادیا کہ انہیں کوئی نوٹس موصول نہیں ہوا ہے۔