کاماریڈی اربن ماسٹر پلان

وزیر بلدی نظم و نسق اور شہری ترقیات کے ٹی راما را نے کاماریڈی ضلع کے عہدیداروں پر ناخوشی کا اظہار کیا جو مجوزہ اربن ماسٹر پلان پر کسانوں کو راضی کرنے میں ناکام رہے ہیں۔

کاماریڈی ضلع کلکٹریٹ میں کسانوں کے احتجاج کا جواب دیتے ہوئے وزیر کے ٹی راما را ؤنے کہا کہ ماسٹر پلان ابھی ڈرافٹنگ کے مرحلے میں ہے اور اسے ابھی حتمی شکل نہیں دی گئی ہے۔

 آج یہاں پٹنا پرگتی پر ایک ورکشاپ سے خطاب کرتے ہوئے  انہوں نے کہا کہ ریاستی حکومت مجوزہ پروجیکٹ پر کوئی یکطرفہ فیصلہ نہیں کرے گی اور ماسٹر پلان کو حتمی شکل دینے سے پہلے تمام مطالبات پر غور کرے گی۔

ورکشاپ کے دوران، انہوں نے کاماریڈی میونسپل کمشنر سے پوچھا کہ عہدیدار کسانوں کو اس موضوع پر قائل کرنے میں کیوں ناکام ہو رہے ہیں کہ ماسٹر پلان ابھی ڈرافٹنگ کے مرحلے میں ہے اور عوامی رائے کی بنیاد پر تبدیلیاں کی جا سکتی ہیں۔

انہوں نے ایک کسان کی موت کے بارے میں بھی دریافت کیا جس نے کاماریڈی میں مجوزہ ماسٹر پلان کے خلاف احتجاج کرتے ہوئے خودکشی کی تھی اور کہا کہ ریاستی حکومت کا کسانوں کو نقصان پہنچانے کا کوئی ارادہ نہیں ہے۔

اگر عوام کی طرف سے کوئی مطالبات ہیں تو عہدیداروں کو انہیں قبول کرنا چاہئے اور شکوک و شبہات کو دور کرنا چاہئے۔ بی آر ایس حکومت لوگوں کی فلاح و بہبود اور ریاست کی مجموعی ترقی کے لئے کام کرتی ہے۔ یہ کبھی بھی لوگوں کے مفاد کے خلاف کام نہیں کرتی ہے۔کے ٹی آر نے یہ بات کہی۔