ٹی ایس پی ایس پیپر افشاں معاملہ : ریاستی بی جے پی صدر بنڈی سنجے‘ ایٹالہ راجندر گرفتار
حیدرآباد:۔17؍مارچ
(زین نیوز )
تلنگانہ پبلک سروس کمیشن کا پیپر افشاں ہونے کے و اقعہ پر تشویش کا سلسلہ جاری ہےاور یہ معاملہ ہلچل مچا رہا ہے۔ ریاستی بی جے پی صدر بنڈی سنجے‘، ایم ایل اے ایٹالہ راجندر بی جے پی لیڈروں کے ساتھ ٹی ایس پی ایس سی کے دفتر کا محاصرہ کرنے گئے۔
جب وہ گن پارک کے قریب پہنچے توپولیس نے بنڈی سنجے اور ایٹالہ راجندر سمیت بی جے پی کے کئی لیڈروں کو گرفتار کر لیا۔ بی جے پی رہنماؤں نے گرفتاریوں کی مزاحمت کی
جس سے بی جے پی کارکنوں اور پولیس کے درمیان ہاتھا پائی ہوئی۔ کچھ دیر تناؤ رہا۔ پولیس نے بنڈی سنجے اور ایٹالہ راجندر کو گرفتار کرلیا۔ بنڈی سنجے کو گرفتار کر کے پولیس کی گاڑی میں کارخانہ پی ایس لے جایا گیا۔ بی جے پی کارکنوں نے پولیس کی گاڑی کو آگے بڑھنے سے روک دیا۔
احتجاج کے پیش نظر ٹی ایس پی ایس سی دفتر کے آس پاس دفعہ 144 نافذ کر دی گئی تھی۔ این ایس یو آئی اور یوتھ کانگریس کے زیراہتمام ٹی ایس پی ایس سی کے دفتر کا محاصرہ کیا گیا۔ جس کے نتیجے میں گاندھی بھون کے گیٹ بند کر دیے گئے اور کارکنوں کو باہر آنے سے روک دیا گیا۔
تاہم انہوں نے گیٹ کود کر باہر نکلنے کی کوشش کی۔ چوکس پولیس نے انہیں اپنی تحویل میں لے لیا۔ وائی ایس آر ٹی پی کے صدر شرمی کو اسی مسئلہ پر احتجاج کی کال دینے کے بعد گھر میں نظر بند کر دیا گیا تھا
اپوزیشن پارٹیاں اس معاملے پر ٹی ایس پی ایس سی کے طریقہ کار کی سخت تنقید کر رہی ہیں۔ خدشات بھی بڑھ گئے ہیں۔ اس معاملے میں ملزمان کو پہلے ہی گرفتار کر کے ریمانڈ پر لیا جا چکا ہے۔
بندی سنجے نے گرفتاری سے قبل ازیں میڈیا سے بات کرتے ہوئے کہاکہ گروپ 1 کا سوالیہ پرچہ لیک ہونے اور لاکھوں طلبہ کو دھوکہ دینے کے لیے کے سی آر کو ذمہ دار ٹھہراتے ہوئے تنقید کی۔
انہوں نے سوال کیا کہ اگر وزیراعلیٰ پیپر افشا ہونے پر اتنا خاموش کیوں ہیں؟ انھو ں نے وزیراعلیٰ سے پیپر لیک پر فوری ردعمل اور موجودہ ججز سے انکوائری کا مطالبہ کیا۔
بنڈی نے بی آر ایس پارٹی کو جمہوریت کے خلاف کام کرنے پر تنقید کی۔ انہوں نے خبردار کیا کہ اساتذہ اس حکومت کو سبق سکھائیں گے۔