کرناٹک بی جے پی نے استعفوں کی فہرست جاری کردی

اسمبلی انتخابات 2023 کے حوالے سے بی جے پی کے تین ممبران اسمبلی نے خود کو پارٹی سے الگ کر لیا ہے۔ بی جے پی نے دو فہرستیں جاری کرکے 212 امیدواروں کے ناموں کا اعلان کیا تھا۔

212 سیٹوں کے لیے 19 موجودہ ایم ایل اے کے ٹکٹوں سے انکار کر دیا گیا ہے۔ سابق ڈپٹی سی ایم لکشمن سوادی نے بدھ کو پارٹی چھوڑ دی

موڈیگیرے بی جے پی کے ایم ایل اے ایم پی کمارسوامی نے جمعرات کو پارٹی سے استعفیٰ دینے کا اعلان کیا، جب انہیں کرناٹک اسمبلی انتخابات میں حصہ لینے کے لیے ٹکٹ دینے سے انکار کیا گیا،

اور قومی جنرل سکریٹری سی ٹی روی کو نامزدگی نہ ملنے کا الزام لگایا۔ تین بار کے ایم ایل اے نے کہا کہ وہ جلد ہی اسمبلی اسپیکر کو بطور قانون ساز اپنا استعفیٰ بھی پیش کریں گے ۔

کمارسوامی نے ٹکٹ نہ ملنے پر بی جے پی کے قومی جنرل سکریٹری سی ٹی روی پر تنقید کی اور کہا کہ وہ اپنے حامیوں اور اپنے حلقہ کے لوگوں سے بات چیت کے بعد اپنے اگلے اقدام کا فیصلہ کریں گے۔ ایم ایل اے نے ٹکٹ سے محروم ہونے کی وجہ ان کے اور روی کے درمیان ذاتی دشمنی بتائی۔

دوسری طرف سابق وزیر کے ایس ایشورپا نے فہرست جاری ہونے سے پہلے ہی انتخابی سیاست سے ریٹائرمنٹ لے لی ہے۔ یعنی سیاست میں رہیں گے، لیکن الیکشن نہیں لڑیں گے۔ یہ بھی کہا جا رہا ہے کہ ان کی عمر 72 سال ہے۔ ایسے میں بی جے پی انہیں مارگدرشک منڈل میں لے سکتی ہے۔

دوسری فہرست کے بعد بھی سابق سی ایم جگدیش شیٹر کے نام کا اعلان نہیں کیا گیا ہے۔ شیٹر ہبلی دھارواڑ سے ایم ایل اے ہیں۔ انہوں نے منگل کو دعویٰ کیا کہ پارٹی نے ان سے الیکشن نہ لڑنے کو کہا ہے۔

انہوں نے ٹکٹ نہ ملنے پر برہمی کا اظہار کیا۔ اس بیان کے بعد انہیں دہلی بلایا گیا، جہاں انہوں نے بدھ کو بی جے پی صدر جے پی نڈا سے ملاقات کی۔

وہیں اُڈپی کے ایم ایل اے رگھوپتی بھٹ کو بھی اس بار پارٹی نے ٹکٹ نہیں دیا ہے، جس کو لے کر وہ کافی جذباتی ہیں۔ بھٹ کو زیادہ دکھ اس بات کا ہے کہ انہیں ٹی وی چینلوں سے اس بات کا پتہ چلا۔ انہوں نے کہاکہ اگر انہیں ان کی ذات کی وجہ سے ٹکٹ نہیں دیا گیا تو وہ اسے قبول نہیں کر سکتے۔

سابق وزیر کے ایس ایشورپا کی ریٹائرمنٹ کے بعد شیموگہ میونسپل کارپوریشن کے 19 ممبران نے اپنے عہدوں سے استعفیٰ دے دیا ہے۔ میئر اور ڈپٹی میئر بھی مستعفی ہو چکے ہیں۔ شیموگہ کے ضلع صدر نے بھی ایشورپا کی حمایت میں استعفیٰ دے دیا ہے۔

واضح رہے کہ اس وقت کے دیہی ترقی اور پنچایت راج وزیر (RDPR) کے ایس ایشورپا پر وزیر کے عہدے پر رہتے ہوئے 40 فیصد کمیشن لینے کا الزام تھا۔

ٹھیکیدار سنتوش پاٹل نے الزام لگا کر خودکشی کر لی جس کے بعد اپریل 2022 میں انہیں وزیر کے عہدے سے استعفیٰ دینا پڑا۔ تاہم تحقیقات کے بعد انہیں کلین چٹ دے دی گئی۔

بی جے پی نے کولار گولڈ فیلڈز (KGF) سے شیڈول کاسٹ کی امیدوار اشونی سمپنگی کو کھڑا کیا ہے۔ داونگیرے نارتھ سے موجودہ ایم ایل اے رابندر ناتھ کو ٹکٹ دینے سے انکار کر دیا گیا ہے۔ ان کی جگہ لوکیکرے ناگراج کو امیدوار بنایا گیا ہے۔

بیندور کے موجودہ ایم ایل اے سوکمار شیٹی کا نام بھی دوسری فہرست میں شامل نہیں ہے۔ ان کی سیٹ سے گروراج گنٹور کو ٹکٹ دیا گیا ہے۔

ہاویری سے نہرو اولیکر کی جگہ گاویسیڈپا کو میدان میں اتارا گیا ہے۔ جے ڈی ایس ایم ایل اے جی ٹی دیوے گوڑا کے داماد رام چندر گوڑا کو چامنڈیشوری سے ٹکٹ دیا گیا ہے۔