ممبئی میں اورنگ زیب کے ساتھ ادھو ٹھاکرے فلیکساں آویزاں
بی جے پی ہم سے بدلے کی سیاست کر رہی ہے۔سنجے راوت
ممبئی :۔22؍جون
(زین نیوز ڈیسک)
ممبئی کے مہیم علاقے میں ادھو ٹھاکرے اور بہوجن ونچیت اگھاڑی کے سربراہ پرکاش امبیڈکر کے فلیکساں لگائے گئے ہیں جن میں اورنگ زیب کی تصویر بھی ہے۔ہورڈنگ پر مراٹھی میں لکھا ہے- ‘پرکاش امبیڈکر اورنگ زیب کی دھن پر ناچ رہے ہیں اور ادھو ٹھاکرے اس کی حمایت کر رہے ہیں۔’
درحقیقت، ادھو دھڑے کے اتحادی پرکاش امبیڈکر نے سنیچر کو سمبھاج نگر میں اورنگ زیب کے مقبرے پر پھول چڑھائے۔ان پوسٹروں کے بارے میں مہاراشٹر کے وزیر دیپک کیسرکر نے کہا کہ اورنگ زیب کے لیے ادھو کا نیا لگاؤ دیکھا جا سکتا ہے۔انہوں نے کہا کہ چھترپتی شیواجی مہاراج ہندوتوا کے ساتھ سمجھوتہ کرنے والوں کو کبھی معاف نہیں کریں گے۔
ممبئی پولیس نے بتایا کہ یہ پوسٹر رات کو لگائے گئے تھے۔ یہ معلوم نہیں کہ انہیں کس نے لگایا۔ پولیس نے کہا کہ ابھی تک کوئی شکایت درج نہیں ہوئی ہے۔ اگر امن و امان کو بگاڑنے کی کوشش کی گئی تو اس معاملے میں نامعلوم افراد کے خلاف ایف آئی آر درج کی جائے گی۔ فی الحال فلیکساں ہٹا دیے گئے ہیں۔
سنجے راوت نے کہا کہ بی جے پی ہم سے بدلے کی سیاست کر رہی ہے، جب کہ ادھو گروپ مہاراشٹر حکومت پر الزام لگا رہا ہے کہ حکومت نے ادھو اور ان کے خاندان کی سیکوریٹی میں کمی کی ہے۔ اس کے بارے میں سنجے راوت نے جمعرات کو کہا کہ چاہے یہ ای ڈی کے چھاپے کے بارے میں ہو یا ادھو ٹھاکرے خاندان کی حفاظت کو کم کرنے کے بارے میں، یہ تمام کارروائیاں صرف سیاسی انتقام کے جذبے سے حکمران جماعت کر رہی ہے۔
سنجے راوت نے کہا کہ یہ سب سیاسی طور پر محرک ہے۔ لیکن جو لوگ ایسا کریں گے ان کو اس کا پھل بھی ملے گا۔ بی جے پی زیادہ سے زیادہ کیا کر سکتی ہے، ہم پر گولی چلا سکتی ہے، ہمیں جیل میں ڈال سکتی ہے۔
مہاراشٹر کے وزیر نے کہاکہ سیکوریٹی میں کمی نہیں کی گئی، راوت جھوٹ بول رہے ہیں دیپک کیسرکر نے کہا کہ سنجے راوت اور آدتیہ ٹھاکرے کو ادھو کی سیکورٹی کم کرنے کے الزامات پر جھوٹ نہیں بولنا چاہئے۔ ادھو ٹھاکرے اور ان کے خاندان کی سیکوریٹی میں کوئی کمی نہیں کی گئی ہے۔
اس کے بارے میں ریاستی وزارت داخلہ نے بدھ کو بتایا تھا کہ سیکوریٹی میں کوئی تبدیلی نہیں کی گئی ہے۔ انھیں اب بھی زیڈ سیکوریٹی مل رہی ہے۔ لیکن جب وہ وزیر اعلیٰ تھے تو انہیں کچھ اضافی سیکوریٹی دی گئی تھی، جسے ہٹا دیا گیا ہے۔ آدتیہ ٹھاکرے ورلی سے ایم ایل اے ہیں، انہیں وائی سیکوریٹی حاصل ہے۔