وارانسی میں شوٹنگ کے دوران نانا پاٹیکر نے مداح کو تھپڑ مار دیا

فلم اداکار نانا پاٹیکر نے وارانسی میں شوٹنگ کے دوران ایک نوجوان کو تھپڑ مار دیا۔ جس پر اب ردعمل آنا شروع ہو گیا ہے۔ آزاد ادھیکار سینا کے قومی صدر امیتابھ ٹھاکر نے فلم اسٹار نانا پاٹیکر کی جانب سے ایک نوجوان کو تھپڑ مارنے اور اس کی گردن پکڑنے کے معاملے میں ایف آئی آر درج کرنے کا مطالبہ کیا ہے۔

وارانسی کے پولیس کمشنر کو بھیجی گئی اپنی شکایت میں امیتابھ ٹھاکر نے کہا ہے کہ فلم جرنی کی شوٹنگ کے دوران نانا پاٹیکر نے ایک نوجوان کو تھپڑ مارا جو دشاسوامیدھ گھاٹ کے قریب سیلفی لے رہا تھا۔ اس سلسلے میں وائرل ہونے والی ویڈیو کو دیکھ کر صاف معلوم ہوتا ہے کہ یہ مجرمانہ فعل ہے۔

 انہوں نے کہا کہ اس جرم کی سنگینی اس لیے بڑھ جاتی ہے کہ یہ ایک معروف فلم سٹار کا مجرمانہ فعل ہے جو کہ معاشرے میں انتہائی اہم مقام رکھتا ہے۔ اس واقعہ کی سماجی سنگینی کو دیکھتے ہوئے امیتابھ ٹھاکر نے فوری طور پر ایف آئی آر درج کرکے مزید کارروائی کا مطالبہ کیا ہے۔

 نانا پاٹیکر نے بھی اس ویڈیو پر ردعمل دیا ہے۔ انہوں نے ایک ویڈیو پیغام میں کہا ایک ویڈیو وائرل ہو رہی ہے جس میں میں نے ایک لڑکے کو ٹکر ماری ہے۔ حالانکہ یہ سیکونس ہماری فلم کا حصہ ہے، لیکن ہم نے ایک ریہرسل کی تھی، ہمیں دوسری ریہرسل کرنی تھی، ڈائریکٹر نے مجھے شروع کرنے کو کہا۔

 ہم شروع کرنے ہی والے تھے کہ ویڈیو میں نظر آنے والا لڑکا آیا۔ میں نہیں جانتا تھا کہ وہ کون ہے۔ میں نے سوچا کہ وہ ہمارے عملے میں سے ہے، اس لیے میں نے منظر کے مطابق اسے تھپڑ مارا اور میں نے اسے وہاں سے جانے کو کہا۔ مجھے معلوم ہوا کہ وہ عملے کا حصہ نہیں ہے

 اس لیے میں اسے واپس بلانے والا تھا لیکن وہ بھاگ گیا شاید اس کے دوست نے ویڈیو بنائی میں نے کبھی کسی کو تصویر کے لیے منع نہیں کیااور میں نہیں کرتا۔ یہ غلطی سے ہوا اگر کوئی غلط فہمی ہوئی ہو تو مجھے معاف کر دینا میں ایسا کبھی نہیں کروں گا۔