بلقیس بانو کیس کے 5 مجرموں نے سپریم کورٹ میں پٹیشن دائر کی
خودسپردگی کے لیے مہلت مانگی
نئی دہلی:۔18؍جنوری
(زین نیوز ڈیسک)
بلقیس بانو کیس کے 11 میں سے 5 مجرموں نے سپریم کورٹ میں عرضی دائر کی ہے جس میں جیل میں خودسپردگی کے لیے مزید وقت دینے کی درخواست کی گئی ہے۔ ان کے وکلاء کا موقف ہے کہ خودسپردگی کے لیے دیا گیا دو ہفتہ کا وقت 22 جنوری کو ختم ہو رہا ہے اس لیے ان کی درخواستوں کی فوری سماعت کی جائے۔ سپریم کورٹ نے اس دلیل کو قبول کر لیا ہے۔
ان پانچ مجرموں میں گووند بھائی نائی، پردیپ موردھیا، بپن چندر جوشی، رمیش چندنا اور متیش بھٹ شامل ہیں۔ ان میں سے کچھ مجرموں نے اپنے بیٹے کی شادی کا حوالہ دیتے ہوئے خودسپردگی کی تاریخ میں توسیع کی درخواست کی ہے
کچھ نے ٹانگوں کی سرجری کے لیےکچھ نے اپنے والدین کی دیکھ بھال کے لیے، کچھ نے فصلوں کی کٹائی کے لیےمہلت دی جائے۔سپریم کورٹ نے 8 جنوری کو 2002 کے گجرات فسادات کے دوران بلقیس بانو کے ساتھ اجتماعی عصمت دری کے ملزم 11 مجرموں کو قبل از وقت رہائی دینے کے ریاستی حکومت کے فیصلے کو مسترد کر دیا تھا۔
عدالت نے کہا تھاکہ گجرات حکومت مجرموں کو کیسے معاف کر سکتی ہے؟ اگر سماعت مہاراشٹر میں ہوئی تو رہائی کا فیصلہ بھی وہاں کی حکومت کرے گی۔ سپریم کورٹ کے فیصلے کے بعد بلقیس کے گھر پر پٹاخے برسائے گئے۔
سپریم کورٹ کے فیصلے کے بعد بلقیس نے کہاکہ آج سے میرا نیا سال شروع ہوا۔8 جنوری کو سپریم کورٹ کے فیصلے کے بعد بلقیس نے سپریم کورٹ کا شکریہ ادا کرتے ہوئے بیان جاری کیا۔
ان کا کہنا تھا کہ آج سے میرے لیے نئے سال کا آغاز ہوا ہے۔ میری آنکھیں راحت کے آنسوؤں سے تر ہیں۔ آج پچھلے ڈیڑھ سال میں پہلی بار میرے چہرے پر مسکراہٹ ہے۔