ڈھاکہ انٹرنیشنل ایئرپورٹ پر آگ بھڑک اٹھی، تمام پروازیں روک دی گئیں

بنگلہ دیش کے دارالحکومت ڈھاکہ میں واقع حضرت شاہ جلال بین الاقوامی ہوائی اڈے کے کارگو ایریا میں ہفتہ کی سہ پہر اچانک خوفناک آگ بھڑک اٹھی، جس کے بعد ایئرپورٹ حکام نے تمام پروازوں کو عارضی طور پر معطل کر دیا۔ایئرلائن بیمان بنگلہ دیش کے ترجمان کوثر محمود کے مطابق، یہ واقعہ دوپہر تقریباً 2 بجکر 15 منٹ پر پیش آیا۔

 آگ لگنے کے بعد ہوائی اڈے کے فائر ڈیپارٹمنٹ، بنگلہ دیش ایئر فورس کے فائر یونٹ اور سول ڈیفنس کے عملے نے فوری طور پر جائے وقوعہ پر پہنچ کر امدادی کارروائیاں شروع کردیں۔فائر سروس حکام کے مطابق، آگ گیٹ نمبر 8 کے قریب واقع کارگو گاؤں کے علاقے میں لگی۔ ابتدائی اطلاعات کے مطابق، آگ کی شدت بہت زیادہ تھی اور شعلوں کے ساتھ اٹھنے والے گھنے سیاہ دھوئیں نے قریبی علاقوں کی فضا کو بھی متاثر کیا۔

 تاہم خوش قسمتی سے کسی جانی نقصان کی اطلاع نہیں ملی۔عینی شاہدین نے بتایا کہ آگ لگنے کے فوراً بعد ہوائی اڈے کے بعض حصوں میں بھگدڑ مچ گئی اور مسافروں کو ایئرپورٹ کے اندرونی حصوں سے نکال کر محفوظ مقامات پر منتقل کیا گیا۔ فائر بریگیڈ کے چار یونٹوں نے موقع پر پہنچ کر تقریباً ایک گھنٹے کی مسلسل کوشش کے بعد آگ پر قابو پالیا۔ایئرپورٹ کے ایگزیکٹیو ڈائریکٹر ایس ایم راغب صمد نے سرکاری نیوز ایجنسی BSS سے گفتگو کرتے ہوئے کہا،> “آگ کارگو ایریا میں لگی تھی

تمام متعلقہ فائر یونٹس نے بروقت کارروائی کرتے ہوئے شعلوں پر قابو پالیا۔ اب کولنگ کا عمل جاری ہے تاکہ دوبارہ آگ بھڑکنے کا خطرہ نہ رہے۔”ایئرپورٹ حکام کا کہنا ہے کہ آگ لگنے کی وجوہات تاحال معلوم نہیں ہو سکیں، تاہم ابتدائی طور پر شبہ ظاہر کیا جا رہا ہے کہ کارگو گودام میں رکھے گئے برقی آلات یا پیکنگ میٹریل سے آگ بھڑکی ہو سکتی ہے۔

ادھر، سول ایوی ایشن اتھاریٹی نے تصدیق کی ہے کہ حفاظتی اقدامات کے تحت پروازوں کی روانگی اور آمد کو عارضی طور پر روک دیا گیا تھا، جو بعد ازاں شام میں بحال کر دی گئیں۔مقامی میڈیا رپورٹس کے مطابق، کارگو سیکشن میں بھاری نقصان ہونے کا خدشہ ہے۔ آگ کے نتیجے میں کچھ قیمتی سامان اور درآمدی اشیاء بھی متاثر ہوئیں۔ حکام نے واقعے کی مکمل تحقیقات کا حکم دے دیا ہے