وزیر اعظم نریندر مودی حکومت کو 24 گھنٹے کا الٹی میٹم

تازہ خبر قومی
زین نیوز

مرکز پرتلنگانہ کے ساتھ امتیاز برتنے کا الزام
ملک بھر میں احتجاج شروع کرنے وزیر اعلی تلنگانہ کے سی آر کا انتباہ

نئی دہلی :11؍اپریل
(زین نیوز)
وزیر اعلی تلنگانہ کے چندر شیکھر راؤ نے وزیر اعظم نریندر مودی حکومت کو 24 گھنٹے کا الٹی میٹم دیا ہے۔ تلنگانہ راشٹرا سمیتی (ٹی آر ایس) کے سربراہ نے کہا ہے کہ اگر 24 گھنٹے کے اندر تلنگانہ میں دھان کی خریداری شروع نہیں کی گئی تو اس کے خلاف ملک بھر میں احتجاج شروع کیا جائے گا۔

ٹی آر ایس کے ارکان پارلیمنٹ اور ایم ایل ایز دیگر منتخب عوامی نمائندوں کے ساتھ دہلی میں دھرنا دے رہے ہیں۔ انہوں نے الزام لگایا کہ مرکزی حکومت کی دھان خریداری پالیسی میں تلنگانہ کے کسانوں کے ساتھ امتیاز برتا جا رہا ہے ۔ اس احتجاج سے خطاب کرتے ہوئے کے سی آر نے کہا کہ میں وزیر اعظم نریندر مودی اور پیوش گوئل سے گزارش کرتا ہوں کہ وہ پورے ملک کی طرح تلنگانہ کے کسانوں سے زرعی مصنوعات خریدیں۔اورہمارا اناج بھی خرید لیں۔

کے چندر شیکھر راؤ نے خوراک کی خریداری کی پالیسی پربی جے پی پر تنقید کی اور کہا کہ جو حکومت زرعی پالیسی نہیں بنا سکتی، اسے عوام اقتدار سے بے دخل کر دیں گے۔ انہوں نے کہا کہ تلنگانہ اپنے حقوق مانگ رہا ہے۔ میں پی ایم مودی سے درخواست کروں گا کہ وہ ایک نئی زرعی پالیسی بنائیں، جس میں ہم سب کو حصہ لینا چاہیے۔ اگر آپ ایسا نہیں کریں گے تو لوگ آپ کو اقتدار سے بے دخل کر دیں گے اور نئی زرعی پالیسی بنائیں گے۔

کے سی آر نے کہا کہ ہم اگلے 24 گھنٹے انتظار کریں گے۔ اگر اس وقت تک تلنگانہ کے کسانوں سے اناج کی خریداری شروع نہیں کی جاتی ہے تو ہم مستقبل کی حکمت عملی طے کرنے میں آزاد ہوں گے۔ انہوں نے نریندر مودی حکومت کو پیغام دیا کہ میں اگلے 2-3 دنوں میں دہلی آؤں گا۔ اس دوران ہم صدارتی انتخابات کے ساتھ ساتھ دیگر امور پر بھی بات کریں گے۔ انہوں نے پی ایم مودی کو خبردار کیا کہ وہ کسانوں کے ساتھ نہ کھیلیں۔

کے چندر شیکھر راؤ نے کہا کہ ہم تلنگانہ سے دوہزارکلومیٹر دور سے یہاں آئے ہیں۔ ہمارے ایم پی اور ایم ایل ایز شدید گرمی میں احتجاج کر رہے ہیں۔ میں پی ایم مودی کو خبردار کرنا چاہتا ہوں کہ آپ کسانوں کے ساتھ نہ کھیلیں۔ یہ باتیں ہندوستان کی تاریخ میں درج ہیں کہ جب بھی کسان روتا ہے، حکومت جاتی ہے۔ کوئی بھی مستقل نہیں ہے۔ جب آپ اقتدار میں ہوں تو کسانوں کے ساتھ ناانصافی نہ کریں

 

یہ بھی پڑھیں : ❇️ پاکستــــان میں بھی’’ چوکیــــدار چور ہےکا نعــــرہ

(Photo: Twitter)

 

 

چیف منسٹر تلنگانہ نے پیوش گوئل کو بھی آڑے ہاتھوں لیا۔ انہوں نے کہا کہ جب تلنگانہ کے وزیر زراعت پیوش گوئل سے ملے تو مرکزی وزیر نے انتہائی غلط انداز میں بات کی۔ گوئل نے اس سے ٹوٹے ہوئے چاول کھانے کو کہا۔ کے چندر شیکھر راؤ نے کہا کہ پیوش گوئل، پیوش بریک اپ ہیں۔ پتا نہیں وہ خود کو کیا سمجھتا ہے۔

کے چندر شیکھر راؤ کے ساتھ کسان لیڈر راکیش ٹکیت بھی مرکزی حکومت کے خلاف جاری تحریک میں شامل تھے۔ اس دوران مسٹر راؤ نے ٹکیت کو یقین دلایا کہ پورا تلنگانہ ان کے ساتھ ہے۔ تلنگانہ کے چیف منسٹر نے کہا کہ راکیش ٹکیت نے وزیر اعظم نریندر مودی کومعافی مانگنے پر مجبور کیا تھا

اس پروگرام میں کسان تحریک لیڈر راکیش ٹیکیٹ،ریاستی وزیر بلدی نظم ونسق و آئی ٹی کے ٹی آر’ ایم ایل سی کے کویتا، کے علاوہ ٹی آر ایس کے ارکان پارلیمان و ارکان اسمبلی، موجود تھے