نئی دہلی : 30؍اگست
(زیڈ این ایم ایس)
پڑوسی ملک پاکستان کو شدید مہنگائی کا سامنا ہے۔ پاکستان میں سبزیوں کی قیمتیں آسمان کو چھو رہی ہیں۔ اتوار کو لاہور کی مارکیٹ میں ٹماٹر کی قیمت 500 روپے فی کلو اور پیاز 400 روپے تک پہنچ گئی۔ لاہور کے ایک ہول سیل ڈیلر کا کہنا ہے کہ کچھ جگہوں پر اس کی ہول سیل قیمتیں 100 روپے کے لگ بھگ ہیں، لیکن ریٹیل مارکیٹ میں جانے سے اس کی قیمت چار سے پانچ گنا بڑھ جاتی ہے۔
انہوں نے کہا کہ بلوچستان، سندھ اور جنوبی پنجاب میں سیلاب کی بگڑتی ہوئی صورتحال کے باعث سبزیوں کی پیداوار بڑے پیمانے پر متاثر ہوئی ہے اور آنے والے دنوں میں اس کی قیمتوں میں مزید اضافے کا قوی امکان ہے۔
ہول سیل تاجر جواد رضوی کا کہنا ہے کہ سیلاب کی سنگین صورتحال اور پیداوار میں کمی کے پیش نظر اگر جلد کوئی ٹھوس اقدامات نہ کیے گئے تو یہاں ٹماٹر اور پیاز کی قیمتیں 700 روپے فی کلو تک پہنچ جائیں گی۔ ضروری سبزیوں میں شامل آلو کی قیمت بھی 40 روپے سے بڑھ کر 120 روپے فی کلو ہو گئی ہے۔
اس وقت پیاز اور ٹماٹر افغانستان سے طورخم بارڈر کے ذریعہ لاہور اور پنجاب کے دیگر شہروں میں آتے ہیں لیکن ناکافی سپلائی کے باعث پاکستان حکومت اب بھارت سے درآمد کرنے کی تیاری کر رہی ہے جو کہ بگا بارڈر سے کی جائے گی۔ درحقیقت پاکستان اس وقت افغانستان سے پیاز ٹماٹر درآمد کر رہا ہے جو کہ اس کی کھپت سے بہت کم ہے۔
پاکستان کے پاس ایران سے سبزیاں درآمد کرنے کا آپشن بھی موجود ہے لیکن یہ کام تفتان بارڈر سے کرنا پڑتا ہے اور ایرانی حکومت نے امپورٹ ایکسپورٹ پر ٹیکس بڑھا دیا ہے۔ یعنی پہلے ہی شدید مہنگائی کا شکار پاکستان کو یہاں سے درآمد کرنا مہنگا پڑے گا۔ ایسے میں ہندوستان اس کے لیے بہترین آپشن لگتا ہے۔
لاہور مارکیٹ کمیٹی کے سیکرٹری شہزاد چیمہ نے بتایا کہ طورخم بارڈر سے روزانہ 100 کنٹینرز ٹماٹر اور 30 کنٹینرز پیاز منگوائے جاتے ہیں۔ اس میں سے دو ٹماٹر اور ایک پیاز لاہور شہر کو بھجوایا جاتا ہے جس کی طلب کے مقابلے میں سپلائی بہت کم ہے۔