کابل ایئرپورٹ کے باہر دھماکہ، ہلاکتوں کا خدشہ ہے: پنٹاگون

تازہ خبر عالمی
زین نیوز

نئی دہلی :26؍اگسٹ
(اے این ایم ایس)

افغانستان کے دارالحکومت کابل کے بین الاقوامی ہوائی اڈے کے باہر زور دار دھماکے کی اطلاع ملی ہے۔ دو امریکی حکام نے بتایا کہ جمعرات کو حامد کرزئی بین الاقوامی ہوائی اڈے پر زور دار دھماکہ ہوا۔خودکش حملہ ہے۔۔خبر رساں ادارے اے ایف پی کے مطابق پنٹاگون کے پریس سیکٹری نے کابل ایئرپورٹ کے باہر دھماکے کی تصدیق کی اور کہا کہ دھماکے میں ہلاکتوں کا خدشہ ہے

ایک امریکی اہلکار کے حوالے سے بتایا ہے کہ کابل ایئرپورٹ کے باہر دھماکہ بظاہر خود کش لگ رہا ہے اہلکار نے بتایا کہ اس واقعہ میں کئی افغان ہلاک ہوئے۔ کئی زخمی بھی ہیں۔ سی این این کے مطابق امریکی صدر جو بائیڈن کو اس حملے سے آگاہ کر دیا گیا ہے۔ اب تک تین امریکی فوجیوں کے زخمی ہونے کی اطلاعات ہیں۔ ایئرپورٹ پر مسلسل فائرنگ کی اطلاعات بھی ہیں۔

اس سے قبل طالبان نے امریکا کو خبردار کیا تھا کہ وہ کسی بھی حالت میں 31 اگست تک ملک چھوڑ دے۔ امریکہ نے مقررہ وقت کے اندر ملک سے فوج واپس بلانے کی بات بھی کی تھی۔ تاہم ، آج وائٹ ہاؤس نے 31 کے بعد بھی ضرورت پڑنے پر ریسکیو آپریشن چلانے کا اعلان کیا تھا

کابل ایئرپورٹ پر خوف و ہراس کا ماحول ہے۔ دریں اثنا ، امریکہ ، آسٹریلیا اور برطانیہ نے اپنے شہریوں سے کہا ہے کہ وہ فی الحال کابل ائیرپورٹ پر نہ جائیں اور جو لوگ ائیرپورٹ کے باہر موجود ہیں ، فورا. وہاں سے ہٹ جائیں۔

کابل میں امریکی سفارت خانے نے کہا ہے کہ وہ امریکی جو کابل ایئرپورٹ کے ایبی گیٹ ، ایسٹ گیٹ یا نارتھ گیٹ پر موجود ہیں وہ فوری طور پر نکل جائیں اور مزید ہدایات کا انتظار کریں۔ ساتھ ہی برطانیہ نے خدشہ ظاہر کیا ہے کہ داعش کابل ایئرپورٹ پر حملہ کر سکتی ہے۔

اس سے قبل امریکہ اور اتحادیوں نے لوگوں پر زور دیا کہ وہ کابل کے ہوائی اڈے سے دور رہیں کیونکہ داعش کے دہشت گردانہ حملے کا خطرہ ہے