ججوں پر ٹرولنگ اور پوسٹنگ‘تلگودیشم ایم ایل ایز سمیت26کو نوٹس!
اے پی ہائی کورٹ میں توہین عدالت کی درخواست پر سماعت‘ڈی جی پی کو سماجی وئپ سائٹس کے جائزہ کی ہدایت
حیدرآباد:۔27؍ستمبر
(زین نیوزبیورو)
سابق چیف منسٹر چندرا بابونائیڈو کو اسکل ڈیولپمنٹ کیس میں گرفتاری کے بعد ریمانڈ پر دیا گیا ۔ تاہم، اس کے بعد ریاستی حکومت کے ایڈوکیٹ جنرل سری رام نے ہائی کورٹ میں ایک مجرمانہ توہین کی عرضی دائر کرتے ہوئے کہا کہ چند افراد سوشل میڈیا پر ہائی کورٹ اور نچلی عدالت کے ججوں کے خلاف رائے زنی کر رہے ہیں۔
ہائی کورٹ کے ڈویژن بنچ نے آج ایک انکوائری کا حکم دیاہے ۔ایڈوکیٹ جنرل سری رام نے حکومت کی طرف سے دلائل سنے۔انہوں نے عدالت کو بتایا کہ سوشل میڈیا پر کچھ ججوں کو نشانہ بناتے ہوئے پوسٹس اور ٹرول کئے جا رہے ہیں۔
انہوں نے کہا کہ ججس کی توہین بھی توہین عدالت کے زمرے میں آتی ہے۔ تاہم، ہائی کورٹ نے ججوں پر بہت سے لوگوں کی طرف سے کئے گئے ٹرول کی سخت مذمت کی۔
ہائی کورٹ بنچ نے اس درخواست میں مدعا علیہ کے طور پر نامزد 26سیاسی قائدین کو نوٹس جاری کرنے کا حکم دیا۔ اس فہرست میں ٹی ڈی پی قائدین بدھا وینکنا، بچھایا چودھری اور دیگر شامل ہیں۔
ہائی کورٹ نے ڈی جی پی آندھراپردیش کو سوشل میڈیا پر ججوں کو ٹرول کرنے والوں کے سوشل میڈیا اکاونٹس کو دیکھنے اور نوٹس دینے کا حکم دیا ہے۔
بنچ نے ٹوئٹر اور فیس بک کو بھی نوٹس دینے کا حکم دیا۔ اس نے رجسٹری عدالت کو مزید کارروائی کرنے کی ہدایت بھی دی۔ مزید انکوائری کو چار ہفتوں کیلئے ملتوی کر دیا۔
اسکل ڈیولپمنٹ کیس میں چندرابابو نائیڈوکو ریمانڈ پر بھیجے جانے کے بعد صدر دروپدی مرمو کو وجئے واڑہ اے سی بی کورٹ کے جج ہمابندو کے خلاف سوشل میڈیا مہم کے بارے میں شکایت بھیجی گئی۔
مغربی گوداوری ضلع کے ایڈوکیٹ رامانوجا را ؤنے ای میل کے ذریعہ صدر جمہوریہ سے شکایت کی۔ رامانوجا را ؤنے اپنی شکایت میں کہا کہ ٹی ڈی پی قائدین ہمابندو کی نجیزندگی کو نیچا دکھانے کے جیسے تبصرے کررہے ہیں۔
اس کے بعد اے پی حکومت کے چیف سکریٹری جواہر ریڈی کو راشٹرپتی بھون سے ایک خط موصول ہوا۔ راشٹرپتی بھون کے سکریٹری پی سی مینا نے سی ایس کو خط لکھا ہے۔ پوسٹیں لگانے والوں کے خلاف کارروائی کا حکم دیا۔ عدالت میں توہین عدالت کی درخواست دائر کر دی گئی۔