سی آئی ڈی نے چندرا بابو نائیڈو کے بیٹے لوکیش کو امراوتی رنگ روڈ کیس میں ملزم نامزد کیا

تیلگو دیشم پارٹی کے رہنما اور آندھرا پردیش کے سابق وزیر اعلی چندرابابو نائیڈو کو گرفتار کرنے کے بعدریاست کا کرائم انویسٹی گیشن ڈپارٹمنٹ (سی آئی ڈی) نائیڈو کے بیٹے نارا لوکیش کو گرفتار کرنے کے لیے پوری طرح تیار دکھائی دیتا ہے۔ سی آئی ڈی نے سابق وزیر نارا لوکیش کو امراوتی اندرونی رنگ روڈ کیس میں ملزم نامزد کیا ہے۔

سی آئی ڈی نے پہلے ہی اس کیس میں چندرابابو نائیڈو کو ملزم نامزد کیا ہے اور اسی عدالت میں ان کے خلاف پرزنر ٹرانزٹ (پی ٹی) وارنٹ کی درخواست دائر کی ہے۔

چندرابابونائیڈو جو اسکل ڈیولپمنٹ اسکام میں پہلے ہی عدالتی حراست میں ہیںنے پیشگی ضمانت کے لیے ہائی کورٹ سے رجوع کیا ہے۔ اسی دن کے بعد سماعت کے لیے آنے کا امکان ہے۔

اے پی حکومت کا دعویٰ ہے کہ اس وقت کے سی ایم چندرابابو نائیڈو نے ٹی ڈی پی لیڈروں کی ملکیت والی زمینوں کی قیمت بڑھانے کے لیے امراوتی اندرونی رنگ روڈ کے ڈیزائن میں تبدیلی کی تھی۔ اپریل 2022 میں آئی پی سی کی مختلف دفعات اور بدعنوانی کی روک تھام کے قانون کے تحت ایک ایف آئی آر درج کی گئی تھی۔

دریں اثناء ٹی ڈی پی صدر چندرابابو کی ضمانت اور تحویل کی درخواستوں پر سماعت ملتوی کر دی گئی ہے۔ اے سی بی کورٹ کے انچارج جج نے اعلان کیا کہ دونوں درخواستوں پر سماعت بدھ تک ملتوی کر دی گئی ہے۔

سپریم کورٹ نے منگل کو نائیڈو کی اسپیشل لیو پٹیشن (ایس ایل پی) کو قبول کیا اور کل ان کی منسوخی کی درخواست پر سماعت کرے گی۔ درخواست میں سی آئی ڈی کی طرف سے ان کے خلاف درج ایف آئی آر کو چیلنج کیا گیا ہے۔

مئی 2022 میں، سی آئی ڈی نے چندرابابو نائیڈو، سابق میونسپل ایڈمنسٹریشن منسٹر ڈاکٹر پی نارائنا، ہیریٹیج فوڈس لمیٹڈ، اور دیگر کے خلاف امراوتی میں ایک اندرونی رنگ روڈ کی تعمیر میں مبینہ بے ضابطگیوں کے الزام میں ایف آئی آر درج کی تھی۔

ایف آئی آر وائی ایس آر کانگریس پارٹی (وائی ایس آر سی پی) منگل گری کے ایم ایل اے اے راما کرشنا ریڈی کی شکایت پر درج کی گئی تھی۔

یہ الزام لگایا گیا تھا کہ 2014 اور 2019 کے درمیان اعلیٰ عہدے پر فائز سرکاری عہدیداروں کے ذریعہ آندھرا پردیش کی راجدھانی کے لئے ماسٹر پلان کے ڈیزائن اور رنگ روڈ کے معاملہ  میں بعض افراد کو غلط فائدہ پہنچانے کے سلسلے میں کچھ غیر قانونی اور بدعنوان سرگرمیاں انجام دی گئیں۔

ہیریٹیج فوڈس چندرابابو نائیڈو کے خاندان کی ملکیت والی کمپنی ہے۔ حکمراں پارٹی نے نائیڈو پر ریاستی دارالحکومت امراوتی کی ترقی میں زمین کے حصول اور دیگر پہلوؤں میں بڑے پیمانے پر بے ضابطگیوں کا الزام لگایا ہے۔

19 ستمبر کو سی آئی ڈی نے فائبر نیٹ اسکام میں چندرا بابو نائیڈو کے خلاف پی ٹی وارنٹ کی درخواست بھی دائر کی تھی۔

سی آئی ڈی کے مطابق، 321 کروڑ روپے کے اے پی فائبر نیٹ پروجیکٹ کے پہلے مرحلے کا ورک آرڈر قواعد کی خلاف ورزی کرتے ہوئے اور ٹینڈر کے عمل میں ہیرا پھیری کرتے ہوئے ٹیرا سافٹ ویئر کو الاٹ کیا گیا تھا۔

اس پروجیکٹ کا مقصد ریاست بھر کے دیہاتوں اور قصبوں کو آپٹیکل فائبر کنیکٹیویٹی فراہم کرنا تھا۔سی آئی ڈی پہلے ہی کہہ چکی ہے کہ وہ تینوں گھوٹالوں میں لوکیش کے رول کی جانچ کر رہی ہے۔ یہ گھوٹالے مبینہ طور پر اس وقت ہوئے جب نائیڈو وزیر اعلیٰ تھے اور لوکیش ان کی کابینہ میں وزیر تھے۔