گمنام خط کے ذریعہ حیدرآباد۔ دہلی روٹ پر اڈیشہ جیسے ٹرین سانحہ کی دھمکی
حیدرآباد:۔ 4 جولائی
(زین نیوز ڈیسک)
ساؤتھ سنٹرل ریلوے کو ایک گمنام خط موصول ہوا ہے جس میں حیدرآباد۔دہلی روٹ پر اڈیشہ جیسے ٹرین سانحہ کی دھمکی دی گئی ہے۔ایس سی آر ڈیویژنل منیجرکو پچھلے ہفتہ موصول ہونے والے خط میں دھمکی دی گئی تھی کہ حیدرآباد دہلی روٹ پر اوڈیشہ جیسا ریل حادثہ پیش آئے گا۔ ریلوے حکام نے حیدرآباد پولیس کو خط کی وصولی سے آگاہ کر دیا ہے۔
ہندوستانی ریلوےنے ایک گمنام خط کی وصولی کے بعد تمام زونز میں ریڈ الرٹ جاری کر دیا ہےانتہائی چوکسی کو یقینی بنانے کے لیے، ریلوے نے اپنے تمام ڈویژنوں کو الرٹ رہنے کی ہدایت کی ہے۔
مزید برآں خط کی وصولی کے بعد ریلوے پروٹیکشن فورس (RPF) اور گورنمنٹ ریلوے پولیس (GRP) یونٹوں کو ہائی الرٹ پر رکھا گیا ہے۔ گمنام خط کے بارے میں ریاستی حکومت کو بھی آگاہ کر دیا گیا ہے۔
ڈپٹی کمشنر آف پولیس چندنا دیپتی نے پیر کو کہا کہ انہیں تین دن پہلے یہ اطلاع ملی تھی اور پولس اس خط کو بھیجنے والے شخص کا پتہ لگانے کے لیے چھان بین کر رہی ہے۔2 جون کو اوڈیشہ کے بالاسور میں ٹرپل ٹرین حادثے میں 290 سے زیادہ لوگ مارے گئے تھے۔
اعلیٰ سطحی انکوائری کے نتائج کے مطابق حادثے کی بڑی وجہ غلط سگنلنگ تھی۔ کمشنر آف ریلوے سیفٹی نے حادثے کے پیچھے تخریب کاری یا سازش کے کسی امکان کو مسترد کر دیا،
حالانکہ سنٹرل بیورو آف انویسٹی گیشن (سی بی آئی) حادثے کی ممکنہ مجرمانہ زاویہ سے تحقیقات کر رہا ہے۔دریں اثنا، ایس سی آر کے جنرل منیجر (جی ایم) ارون کمار جین نے پیر کو تمام محکموں کے سربراہان کے ساتھ حفاظتی جائزہ میٹنگ کی۔
تمام چھ ڈویژنوں (سکندرآباد، حیدرآباد، وجئے واڑہ، گنٹکل، گنٹور اور ناندیڑ) کے ڈویژنل ریلوے مینیجر (ڈی آر ایم) ویڈیو کانفرنس کے ذریعہ جائزہ میٹنگ میں شامل ہوئے۔
جین نے ٹرین آپریشن کی حفاظت اور زون میں ٹرینوں کی پریشانی سے پاک نقل و حرکت کو یقینی بنانے کے لیے افرادی قوت کے انتظام کا تفصیلی جائزہ لیا۔
انہوں نے عہدیداروں کو ہدایت دی کہ وہ قائم کردہ حفاظتی اصولوں پر عمل کریں اور عملے کے بہترین استعمال کے لیے نئے آئیڈیاز کے ساتھ آئیں۔
انہوں نے عہدیداروں سے یہ بھی کہا کہ وہ زون میں حفاظتی مہم جاری رکھیں اور ٹرین آپریشنز کی حفاظت کو یقینی بنانے کے لیے معائنہ کو تیز کریں۔
ایس سی آر جی ایم نے ڈویژنل افسران اور عملے کو ہدایت دی کہ وہ وقتاً فوقتاً جاری کردہ ریلوے بورڈ کے رہنما خطوط کے مطابق حفاظتی طریقہ کار پر سختی سے عمل کریں۔
بعد ازاں، انہوں نے ٹرینوں میں اے سی اور نان اے سی دونوں کوچوں میں آگ کا پتہ لگانے کے آلات اور آگ بجھانے والے آلات کی دستیابی کا بھی تفصیلی جائزہ لیا۔
انہوں نے ڈی آر ایمز کو ہدایت کی کہ وہ حفاظت کو یقینی بنانے اور وقت کی پابندی کو بہتر بنانے کے لیے اثاثوں کی مناسب دیکھ بھال کو یقینی بنانے کے لیے باقاعدہ معائنہ کریں۔