نئی دہلی:۔31؍دسمبر
(زیڈ این ایم ایس)
گجرات کے نوساری ضلع میں ہفتہ کی صبح ایک بس اور ایس یو وی کے درمیان تصادم میں نو افراد ہلاک اور 30 زخمی ہوگئے۔ موصولہ اطلاعات کے مطابق فارچیونر غلط سمت سے تیز رفتاری سے آرہی تھی کہ مخالف سمت سے آنے والی بس سے ٹکرا گئی۔ اس حادثے میں فارچیونر میں سوار تمام 8 افراد ہلاک ہو گئے۔
بس سورت سے ولساڈ جا رہی تھی۔ ایس یو وی کے تمام مسافر پرو لائف کیمو فارما، انکلیشور کے ملازم بتائے جاتے ہیں۔ بس میں سوار ایک مسافر کی بھی موت ہو گئی۔ حادثے کے بعد بس ڈرائیور کو دل کا دورہ پڑا۔ حادثہ نوساری میں قومی شاہراہ نمبر 48 پر ویسما گاؤں کے قریب پیش آیا۔
حادثے کی اطلاع ملتے ہی پولیس موقع پر پہنچی اور دونوں گاڑیوں میں پھنسے لوگوں کو باہر نکالا۔ پولیس نے لاشوں کو فارچیونر سے نکال کر پوسٹ مارٹم کے لیے بھیج دیا۔ تصادم اتنا شدید تھا کہ پولیس کو لاش نکالنے کے لیے ایس یو وی کو گیس کٹر سے کاٹنا پڑا۔
تصادم کے باعث بس کو بھی نقصان پہنچا۔ بس میں پھنسے زخمیوں کو نکالنے کے لیے بس کا کچھ حصہ کاٹنا پڑا۔ جس کی وجہ سے زخمیوں تک امداد پہنچنے میں تھوڑی تاخیر ہوئی ہے۔ صبح ہونے والے اس حادثے کے بعد نیشنل ہائی وے 48 پر لمبا جام لگ گیا۔
پولیس نے کرین کی مدد سے دونوں گاڑیوں کو سڑک کے کنارے لگا کر ٹریفک کو بحال کیا۔ پولیس سے موصولہ اطلاع کے مطابق نجی بس صد سالہ تقریبات دیکھ کر احمد آباد سے ولساڈ واپس آرہی تھی۔
فارچیونر ولساڈ کے راستے بھروچ جا رہی تھی۔ ایس یو وی ڈیوائیڈر کے غلط سائیڈ پر چلی گئی اور دوسری طرف سے آنے والی بس سے ٹکرا گئی۔
پولیس کے مطابق ابتدائی تفتیش سے معلوم ہوا ہے کہ بس ڈرائیور کو پہلے سے دل کا عارضہ تھا۔ حادثے کے بعد گھبراہٹ میں انہیں دل کا دورہ پڑا۔
دوسری جانب حادثے میں زخمی 11 افراد کو نوساری کے ایک پرائیویٹ ہسپتال میں داخل کرایا گیا ہے، 17 افراد کو علاج کے لیے ولساڈ کے ڈاکٹر ہاؤس منتقل کیا گیا ہے اور ایک زخمی کو علاج کے لیے سورت کے سول اسپتال بھیجا گیا ہے۔