چیف منسٹرریونت ریڈی تلنگانہ کے ایکناتھ شنڈے  :کے ٹی آر

ریونت ریڈی نے پہلے کہا تھا کہ اڈانی اور پردھانی ڈبل انجن تھے اور اب یہ ٹرپل انجن بن گیا ہے۔ جس کا انہوں نے طنز کیا ۔ ریونت ریڈی کے بیانات پر تنقید کرتے ہوئے کے ٹی آر نے ان سے کہا کہ وہ اپنے وعدے کے مطابق 100 دنوں کے اندر وعدوں کو پورا کرنے پر توجہ دیں اور بعد میں وہ بی آر ایس پارٹی کو 100 میٹر زمین میں دفن کرنے کے بارے میں غورکریں۔

انہوں نے سوال کیا کہ آپ بی آر ایس پارٹی کو کیوں دفن کرنا چاہتے ہیں؟ کیا یہ تلنگانہ کے حصول کیلئے ، تلنگانہ کو ترقی دینے کی وجہ سے، یا کانگریس پارٹی کے جھوٹے وعدوں پر سوال اٹھانے کی پاداش میں؟۔ بی آر ایس پارٹی نے اپنے سفر میں ریونت ریڈی جیسے ہزاروں تکبر والے لیڈروں کو دیکھا ہے۔

انہوں نے مزید کہا کہ پارٹی دو دہائیوں سے مضبوط ہے اور ایسے لیڈروں کو ان کی جگہ دکھائی ہے۔ کے ٹی آر نے کہا کہ لوگوں کو موجودہ بلوں کی ادائیگی اس وقت تک نہیں کرنی چاہئے جب تک کہ گروہا جیوتھی اسکیم کے تحت مفت برقی فراہم نہیں کی جاتی جیسا کہ ریونت ریڈی نے انتخابی مہم کے دوران وعدہ کیا تھا۔

انہوں نے ریونت ریڈی کے الفاظ کا حوالہ دیا جنہوں نے کہا تھا کہ سونیا گاندھی کانگریس کے اقتدار میں واپس آنے کے بعد موجودہ بل ادا کریں گی۔

انہوں نے کہا کہ اگرعہدیدار موجودہ بلوں کی ادائیگی کے لئے کہتے ہیں تو انہیں ریونت ریڈی کا ویڈیو دکھائیں۔ انہوں نے لوگوں سے یہ بھی کہا کہ وہ اپنے موجودہ بل نئی دہلی میں 10 جن پتھ پر سونیا گاندھی کے گھر بھیج دیں۔ کے ٹی آر نے کہا کہ کانگریس وعدے کے مطابق حیدرآباد میں گروہا جیوتی اسکیم کے تحت مفت برقی فراہم کرے گی۔

انہوں نے مطالبہ کیا کہ پارٹی اس اسکیم کو فوری طور پر متعارف کرائے اور کرایہ داروں پر لاگو کیا جائے جو کرائے کے مکانوں میں رہتے ہیں۔ کے ٹی آر نے مطالبہ کیا کہ کانگریس حکومت فوری طور پر مہا لکشمی اسکیم کے تحت ریاست کی ہر خاتون کو 2.500 روپئے کی تقسیم شروع کرے۔ بی آر ایس پارٹی کانگریس حکومت کو نہیں بخشے گی اگر وہ وعدے پورے نہ کرکے فرار ہونے کی کوشش کرتی ہے۔

کے ٹی آر نے واضح کیا کہ بی جے پی اور بی آر ایس کا ابھی یا مستقبل میں کسی قسم کا اتحاد نہیں ہوگا۔ مرکزی وزیر کشن ریڈی پر حملہ کرتے ہوئے کے ٹی آر نے پوچھا کہ ریڈی نے اپنی حیثیت میں تلنگانہ کیلئے کیا کیا؟ انہوں نے مزید کہا کہ کے سی آر نے کالیشورم پراجیکٹ کی تعمیر کے دوران، کشن ریڈی نے سیتا پھل منڈی ریلوے اسٹیشن پر لفٹوں کا افتتاح کیا۔

انہوں نے کہا کہ بی آر ایس حکومت نے 36 فلائی اوور بنائے لیکن بی جے پی کو اپل اور عنبرپیٹ فلائی اوور کی تعمیر مکمل کرنے میں برسوں لگ رہے ہیں۔ کے ٹی آر نے قائدین اور پارٹی کارکنوں کا شکریہ ادا کیا جنہوں نے حیدرآباد میں بی آر ایس کی جیت کیلئے سخت محنت کی۔ انہوں نے اسمبلی انتخابات میں بی آر ایس کے ساتھ کھڑے ہونے پر حیدرآباد کے عوام کا شکریہ ادا کیا۔

بی جے پی اور اس کی قیادت پر حملہ کرتے ہوئے کے ٹی آر نے کہا کہ ریاست میں بی جے پی کو محدود کرنے کا اختیار صرف بی آر ایس کے پاس ہے۔ انہوں نے کہا کہ بی جے پی کے سینئر قائدین کو چند اسمبلی حلقوں میں مقابلہ کرنے کا خدشہ ہے کیونکہ وہ جانتے ہیں کہ انہیں بی آر ایس امیدواروں سے شکست ہوگی۔

انہوں نے کہا کہ اسمبلی انتخابات کے نتائج صرف بی آر ایس پارٹی کیلئے ایک ا سپیڈ بریکر تھے اور نتائج سے قطع نظر پارٹی عوام کے ساتھ کھڑی رہے گی۔انہوں نے مزید کہا کہ تلنگانہ میں کانگریس کی حکمرانی کے صرف 50 دنوں میں آٹو ڈرائیورس سمیت کئی شعبوں کے لوگ مشکلات کا شکار تھے اور خودکشی کر رہے تھے۔

کے ٹی آر نے کہا کہ کسانوں کو رعیتو بندھو کی رقم نہیں مل رہی ہے، خواتین کو 2500 روپے نہیں مل رہے ہیں، کانگریس حکومت اسکیموں کو نافذ کرنے سے بچنے کی کوشش کر رہی ہے۔

وگوں کو یاد رکھنا چاہیے کہ کانگریس نے چھ ضمانتیں نہیں دی تھیں، بلکہ 420 وعدے کئے تھے۔ کے ٹی آر نے مزید کہا کہ وہ کانگریس پارٹی سے اس وقت تک سوال کریں گے جب تک وہ انتخابی وعدوں کو پورا نہیں کرتی۔