نئے پارلیمنٹ ہاؤس میں ’ بھارت ماتا، جئے شری رام اور ہر ہر مہادیو‘ کے نعرے گونجے۔

نئے پارلیمنٹ ہاؤس کے افتتاح کے بعد اتوار کو وزیر اعظم نریندر مودی کے لوک سبھا میں داخل ہونے سے پہلے، پورا کمرہ تالیوں اور مودی۔مودی، بھارت ماتا، جئے شری رام اور ہر ہر مہادیو کے نعروں سے گونج اٹھا ۔

پی ایم مودی کی آمد سے لے کر لوک سبھا اسپیکر اوم برلا اور راجیہ سبھا کے ڈپٹی چیئرمین ہری ونش کے ساتھ اسٹیج پر ان کی آمد تک تالیاں بجتی رہیں اور تقریب کا باقاعدہ آغاز ہوا۔

 کمرے کے اندر دو بڑی اسکرینیں لگی ہوئی تھیں، جن پر مودی کی آمد کا لائیو ٹیلی کاسٹ کیا جا رہا تھا۔ جیسے ہی وزیر اعظم نے کمرے میں قدم رکھا، اس دوران کچھ اراکین نے ‘شیواجی مہاراج کی جئے کے نعرے بھی لگائے

لوک سبھا کی سابق اسپیکر سمترا مہاجن اور سینئر بی جے پی لیڈر مرلی منوہر جوشی کو بھی پہلی قطار میں بیٹھے دیکھا گیا۔ مرکزی وزیر خزانہ نرملا سیتا رمن سرخ ساڑھی میں اور مرکزی وزیر اسمرتی ایرانی پیلی ساڑھی میں ایک ساتھ کمرے میں داخل ہوئیں۔

جب وزیر اعظم مودی اسٹیج سے خطاب کر رہے تھے تو ساکشی مہاراج سمیت کئی ممبران بھی ان کا ویڈیو بناتے نظر آئے۔ مودی کی تقریباً 35 منٹ کی تقریر کے دوران کم و بیش ہر دو لائنوں کے بعد تالیاں بجنے لگیں اور جب ان کا خطاب ختم ہوا تو اراکین نے چند منٹوں کے لیے کھڑے ہو کر تالیاں بجائیں۔

PM Modi gets a thunderous welcome in the new, majestic and magnificent building of the Parliament!#MyParliamentMyPride pic.twitter.com/y32O6p91U2

— BJP (@BJP4India) May 28, 2023

اسمرتی ایرانی نے مہاجن اور جوشی کے قدم چھو کر آشیرواد لیا۔ یوگی آدتیہ ناتھ اور امت شاہ نے بھی ان کی خیریت دریافت کی۔ جیسے ہی آدتیہ ناتھ اور شاہ اپنے چیمبر میں پہنچے تو بڑی تعداد میں ممبران پارلیمنٹ اور معززین نے ان کا استقبال کیا۔ کئی ممبران پارلیمنٹ کو دونوں لیڈروں کے ساتھ تصاویر اور سیلفی لیتے ہوئے بھی دیکھا گیا۔

امت شاہ کے آنے کے بعد آندھرا پردیش کے چیف منسٹر وائی ایس جگن موہن ریڈی آئے اور ان کے پاس بیٹھ گئے اور پھر دونوں قائدین نے کچھ دیر بات چیت کی۔ بعد میں وہ نرملا سیتا رمن کے ساتھ بحث میں نظر آئے۔ اتراکھنڈ کے وزیر اعلی پشکر سنگھ دھامی کو تریپورہ، میگھالیہ اور سکم کے اپنے ہم منصبوں – مانک ساہا، پیما کھانڈو اور پریم سنگھ تمانگ کے ساتھ دوسری قطار میں بیٹھے دیکھا گیا۔

وزیر خارجہ ایس جے شنکر سمیت کئی مرکزی وزراء کو دوسری قطار میں بیٹھے دیکھا گیا۔ شیو سینا کے شندے دھڑے کے ممبران اسمبلی رنگ برنگی پگڑیاں پہن کر سب کی توجہ مبذول کر رہے تھے۔ متھرا سے بی جے پی ایم پی ہیما مالنی کئی خواتین ممبران پارلیمنٹ کے ساتھ بیٹھی تھیں۔ انہیں تصاویر اور سیلفیز لیتے ہوئے بھی دیکھا گیا۔

 کچھ ممبران نے وہاں موجود سیکورٹی اہلکاروں کو زور دے کر گروپ میں تصویریں بنوائیں۔ بی جے پی کے رکن پارلیمنٹ ورون گاندھی اپنی والدہ اور سابق مرکزی وزیر مینکا گاندھی کے ساتھ پہنچے اور پچھلی قطار میں ایک ساتھ بیٹھ گئے۔