ناکامیوں کو چھپانے ٹی آر ایس کے نام کی تبدیلی

چیف منسٹراتر پردیش یوگی آدتیہ ناتھ نے آج ویملواڑا اسمبلی حلقہ میں بی جے پی کیلئے مہم چلائی۔اجتماع سے خطاب کرتے ہوئے یوگی نے بی آر ایس اور کانگریس پارٹیوں پرحملہ بولا۔

انہوں نے الزام لگایا کہ حکمراں پارٹی عوام سے کئے گئے اپنے وعدوں کو پورا کرنے میں ناکام رہی اور مزید کہا کہ اس نے اپنی ناکامیوں کو چھپانے کیلئے اپنا نام ٹی آر ایس سے بدل کر بی آر ایس کردیا ہے۔

 انہوں نے الزام لگایا کہ چیف منسٹرکے چندرشیکھرراؤ یوم آزادی تلنگانہ منانے سے محض مجلسی لیڈر اسد الدین اویسی کی وجہ سے گریزاں ہیں۔کیو ںکہ وہ ان سے خائف کھاتے ہیں۔ انہوں نے کہا کہ تلنگانہ میں حکمراں پارٹی نے پانی، فنڈس اور ملازمتوں کی فراہمی سے متعلق کوئی بھی وعدہ پورا نہیں کیا۔

چیف منسٹراتر پردیش نے الزام لگایا کہ کے سی آر کے خاندان نے بدعنوانی اور خاندانی حکمرانی کے ساتھ تلنگانہ ریاست کا استحصال کیا ہے۔

انہوں نے کہا کہ اگر بی جے پی اقتدار میں آتی ہے تو وہ مسلم ریزرویشن کو ختم کر کے دیگر پسماندہ طبقات کو الاٹ کر دیں گے۔ انہوں نے کہا کہ تلنگانہ جس کی آمدنی فاضل ہے، کو کے سی آر نے قرضوں میں ڈوبی ہوئی ریاست میں تبدیل کر دیا ہے۔

یہ بتاتے ہوئے کہ اتر پردیش میں بھی ایسی ہی صورتحال تھی جس کا آج تلنگانہ ریاست سامنا کر رہی ہے، یوگی نے دعوی کیا کہ اب انہوں نے یوپی میں اسے پوری طرح بدل دیا ہے۔انہوں نے کہاگزشتہ چھ سالوں میں، ہم نے بے روزگاری کا خاتمہ کیا، کسانوں کیلئے بہت سے اچھے کام کئے اور مظلوم طبقات کے ساتھ کھڑے ہوئے۔

تلنگانہ میں بھی ایسی صورتحال پیدا ہونے کیلئے ڈبل انجن والی حکومت آنی چاہئے۔ انہوں نے دعوی کیا کہ دنیا کے سامنے ہندوستان کی عظمت کو ظاہر کرنے کے علاوہ وزیر اعظم نریند مودی کو ہندوستان کو سیکورٹی کے معاملے میں مضبوط بنانے کا سہرا بھی دیا گیا ہے۔

یہ بتاتے ہوئے کہ بی جے پی کے بزرگ رہنما سی ایچ ودیا ساگر را ؤنے مہاراشٹر کے گورنر اور مرکزی وزیر کی حیثیت سے خدمات انجام دیں،

 انہوں نے کہا کہ ان کے بیٹے ڈاکٹر چنامنینی وکاس کو ویملواڑا اسمبلی حلقہ کی ترقی کیلئے ایم ایل اے کی حیثیت منتخب کیا جانا چاہیے۔ یہ بتاتے ہوئے کہ ایودھیا میں رام مندر کی تعمیر جاری ہے، انہوں نے لوگوں سے مفت ایودھیا جانے کی اپیل کی۔