شاہجہاں پورمیں مسجد کی بے حرمتی ‘ اشرارکے ہاتھو ں مقدس قران مجید و دیگر کتابوں کو نذر آتش کرنے کا دلسوز واقعہ

اترپردیش کے شاہجہاں پور میں چوک کوتوالی علاقہ میں بیری چوکی کے قریب واقع مسجد کے اندرقرآن مجید اور دیگر مذہبی کتابوں کو آتش کرنے کا دلسوز واقعہ پیش آیا جس کے بعد علاقہ میں کشیدگی پھیل گئی۔ یہ واقعہ بدھ کی دوپہر دو بجے کے قریب پیش آیا۔ شام کو واقعہ کی اطلاع ملتے ہی بہت سے لوگ مسجدکے باہر جمع ہو گئے۔ مسلمانوں میں سخت غم وغصہ پایا جا رہا ہے

جس کے بعد لوگ مشتعل ہو گئے اور احتجاج منظم کیا۔ انہوں نے مین روڈ بلاک کرنے کی کوشش کی۔ انتظامیہ اور پولیس حکام موقع پر پہنچ گئے۔ لوگوں کو سمجھانے کی کوشش کرتے رہے لیکن، متفق نہ ہوئے مسلمانوں نے احتجاج منظم کیا اور قصور واروں کو گرفتار کر نے اور ان کے خلاف سخت کارروائی کرنے کا مطالبہ کیا۔

مشتعل ہجوم نے آس پاس کے بی جے پی لیڈروں کے ہورڈنگز کو اتار کر آگ لگا دی۔ یہ دیکھ کر پولیس کو مورچہ سنبھالنا پڑا اور مشتعل ہجوم کو لاٹھیوں سے منتشر کرنا پڑا۔ احتیاطی طور پر پولیس فورس کو موقع پر تعینات کیا گیا ہے۔

سید شاہ فخر عالم میاں کی مسجد شاہجہاں پور شہر کے چوک کوتوالی علاقے کے محلہ باوزئی میں ہے۔ بدھ کی شام کچھ دیر میں دو نوجوان مسجد میں داخل ہوئے اور وہاں رکھے مذہبی  کتابوں کو جلا دیا۔ امام حافظ ندیم اور دیگر نماز کے لیے پہنچے تو انہوں نے مذہبی کتاب کے جلے ہوئے صفحات دیکھ کر دوسرے لوگوں کو اطلاع دی۔

شام گئے لوگوں کی بڑی تعداد مسجد کے باہر اور بیری چوکی روڈ پر جمع ہوگئی۔ جس کی وجہ سے ٹریفک جام ہوگیا۔ اے ڈی ایم انتظامیہ رام سیوک دویدی، اے ایس پی سٹی سنجے کمار فورس کے ساتھ موقع پر پہنچ گئے۔ دونوں افسران نے امام اور وہاں موجود دیگر لوگوں سے بات کی۔ ملزم کی گرفتاری کے لیے مہلت مانگی۔

پولیس نےعجلت میں نامعلوم افراد کے خلاف مقدمہ درج کرکے معاملے کی تحقیقات شروع کردی۔ اس کے بعد ہجوم مرکزی سڑک سے ہٹ گیا لیکن بڑی تعداد میں لوگ اب بھی مسجد کے باہر موجود ہیں۔ حکام انہیں سمجھانے کی کوشش کر رہے ہیں لیکن وہ واپس جانے کو تیار نہیں ہیں۔

سی او سٹی اکھنڈ پرتاپ سنگھ نے بتایا کہ مسجد کے قریب واقع شو روم کے سی سی ٹی وی میں دو نوجوان دکھائی دے رہے ہیں۔ خیال کیا جا رہا ہے کہ یہ حرکت ان دونوں نے کی ہے۔ انہوں نے کہا کہ دونوں کو جلد گرفتار کر لیا جائے گا۔