مودی کا شہنشاہ اور کے سی آرکا بادشاہ کی طرح برتاؤ‘ آر ایس ایس بے بھروسہ

سابق وزیر مسٹرمحمد علی شبیر نے کانگریس لیڈر راہول گاندھی کی بھارت جوڑو یاترا پر تنقید کرنے پر ٹی آر ایس کے کارگزار صدر اور وزیر کے ٹی راما راؤ کو سخت تنقید کا نشانہ بنایا اور کہا کہ کے ٹی آر ملک کو متحد کر نے والے ایسے لیڈر کے بارے میں بات کرنے کا کوئی اخلاقی حق نہیں رکھتے جو وہ کوشش کررہے ہیں۔

آج گاندھی بھون میں میڈیا کے نمائندوں سے بات کرتے ہوئے محمد علی  شبیر نے کہا کہ کے ٹی آر یا دیگر ٹی آر ایس قائدین بھارت جوڑو یاترا کے جوہر اور اہمیت کو کبھی نہیں سمجھ سکتے جس کا مقصد قوم کو نفرت اور تقسیم کی سیاست کے خطرات سے بچانا ہے۔ انہوں نے الزام لگایا کہ کے ٹی آر نہ تو تفرقہ انگیز سیاست کے خطرات کو محسوس کرنے کی صلاحیت رکھتے ہیں اور نہ ہی وہ فرقہ پرست طاقتوں کے خلاف اتحاد کی اہمیت کو سمجھتے ہیں۔

 ٹی آر ایس قائدین انتخابات اور انحراف سے آگے نہیں سوچ سکتے۔ جب کے ٹی آر کے مرکز میں بی جے پی حکومت پر ان کا فون ٹیپ کرنے کے الزام پر ردعمل کیلئے پوچھا گیا تو مسٹرمحمد علی شبیرنے کہا کہ ٹی آر ایس وہی دوا چکھ رہی ہے جو اس نے تلنگانہ میں اپوزیشن لیڈروں کو دی تھی’’ٹی آر ایس حکومت نے غیر قانونی فون ٹیپنگ کا سہارا لیا اور اپوزیشن لیڈروں، خاص طور پر کانگریس پارٹی سے تعلق رکھنے والوں کی سرگرمیوں کی جاسوسی کی۔

 حالات اتنے خراب تھے کہ چیف منسٹر مسٹرکے چندر شیکھر راؤ نے چند وزرا ء سمیت ٹی آر ایس قائدین پر کڑی نظر رکھی۔ عوامی مسائل پر نمائندگی کرنے کیلئے چندوزرا ء کو فون کرنے کی کوشش کی، انہوں نے میرا فون نہیں اٹھایا۔ جب میں نے ان سے ذاتی طور پر اس کی شکایت کی تو انہوں نے مجھے بتایا کہ انہیں کے سی آر دیکھ رہے ہیں اور ان کے تمام فون ٹیپ کئے جا رہے ہیں۔

مسٹرمحمد علی شبیرنے کہا کہ یہ مضحکہ خیز لگتا ہے جب کے ٹی آر پیگاسس سافٹ ویئر کے ذریعہ مرکز کی بی جے پی حکومت کے ذریعہ فون ٹیپ کرنے کی شکایت کرتے ہیں۔ انہوں نے کہا کہ ٹی آر ایس خاموش تماشائی بنی رہی جب کانگریس نے پیگاسس مسئلہ پر مرکز میں وزیر اعظم نریندر مودی کی قیادت والی بی جے پی حکومت کے خلاف سخت احتجاج درج کیا۔

 انہوں نے کہا کہ ٹی آر ایس نے کھل کر بی جے پی حکومت کی حمایت کی جب پوری اپوزیشن نے غیر قانونی فون ٹیپنگ پر اعتراض کیا اور آج کے ٹی آر غلط طریقہ سے شکار کا کارڈ کھیلنے کی کوشش کر رہے ہیں۔کانگریس لیڈر نے کہا کہ یہ چیف منسٹر کے سی آر تھے جنہوں نے جمہوریت کا مذاق اڑایا اور تلنگانہ میں بڑے پیمانے پر انحراف کرکے آئین کی توہین کی۔

ممبران پارلیمنٹ سے لے کر سرپنچوں تک کے سی آر نے سینکڑوں منتخب نمائندوں کو پیسے، عہدوں اور دیگر فوائد کے لیے ٹی آر ایس کا حصہ بنایا۔ درحقیقت بی جے پی کو منتخب نمائندوں کو وفاداریاں بدلنے کے لئے ٹی آر ایس سے تحریک ملی۔ آج دونوں پارٹیاں منحرف ہونے والوں کی وجہ سے بچ رہی ہیں۔

 انہوں نے کہا کہ کے سی آر کابینہ میں زیادہ تر وزراء کا تعلق اصل ٹی آر ایس سے نہیں ہے اور وہ کانگریس یا ٹی ڈی پی سے آئے ہیں۔ لہذا، انہوں نے کہا کہ وزیر کے ٹی آر  بلکہ کے سی آر دونوں کو اخلاقی سیاست پر بات کرنے کا حق ہی نہیں۔ انہوں نے الزام لگایا کہ مودی دہلی میں  شہنشاہ کی طرح  اور کے سی آر تلنگانہ کے بادشاہ کی طرح برتاؤ کر رہے ہیں۔

 آر ایس ایس کے سربراہ موہن بھاگوت کے مسجد اور مدرسہ کے دورے  سے متعلق سوال کا جواب دیتے ہوئے مسٹرمحمد علی  شبیر نے کہا کہ آر ایس ایس لیڈروں پر بھروسہ نہیں کیا جا سکتا۔ تمام شہریوں کو، ان کے مذہب یا ذات سے قطع نظر، ہندوستان کے آئین کے مطابق مساوی حقوق اور اختیارات حاصل ہیں۔ تاہم، آر ایس ایس لوگوں کے درمیان ان کے مذہب کی بنیاد پر نفرت اور تقسیم کو فروغ دیتا ہے۔

 انہوں نے کہا کہ بعض اوقات یہ لوگوں کی توجہ حقیقی مسائل سے ہٹانے کیلئے ڈرامے بناتا ہے۔ اس سے پہلے دن میں مسٹر محمد علی شبیر نے گاندھی بھون میں اے آئی سی سی کے صدارتی امیدوار ملکارجن کھرگے کے ساتھ ایک  اجلاس سے بھی خطاب کیااور کہا کہ کھرگے کا تعلق گلبرگہ سے ہے اور انہوں نے حیدرآباد میں تعلیم حاصل کی ۔

اس لئے ان کے تلنگانہ کانگریس قائدین سے قریبی تعلقات ہیں۔ انہوں نے امید ظاہر کی کہ ٹی پی سی سی کے تقریبا تمام مندوبین کھرگے کو ووٹ دیں گے تاکہ انہیں اے آئی سی سی کا نیا صدر منتخب کیا جا سکےا