ملک اگنی پتھ کی آگ کی لپیٹ میں۔چوتھے دن بھی احتجاج جاری
اگنیوروں کے لیے 10 فیصدجائیدادیں محفوظ رکھنے وزارت داخلہ کا علان
نئی دہلی :18؍جون
(زیڈ ایم این ایس)
مرکزی حکومت کی فوجی دستوں میں بھرتی کی نئی اگنی پتھ اسکیم کے خلاف ملک جل رہا ہے۔ بہار، یوپی، دہلی، جھارکھنڈ سمیت ملک کی کئی ریاستوں میں طلبہ تحریک پر نکلے ہوئے ہیں۔ مسلسل احتجاج جاری ہے۔ مشتعل مظاہرین نے بہار سے تلنگانہ جانے والی کئی ٹرینوں کو آگ لگا دی۔ ریلوے سٹیشن میں توڑ پھوڑمچایا۔ اسکیم ‘اگنی پتھ’ کے خلاف مسلسل چوتھے دن بھی احتجاج جاری ہے۔
آج ‘بہار بند’ کا اعلان کیا گیا ہے ۔یوپی میں بھی طلباء سڑکوں پر احتجاج کر رہے ہیں۔ تازہ معاملہ جونپور کا ہے جہاں مشتعل افراد نے ایک بس کو آگ لگا دی۔ مشتعل طلباء سڑک بلاک کرکے اسکیم کے خلاف احتجاج کررہے ہیں۔جبکہ یوپی میں 260 گرفتاریاں ہوئی ہیں
اگنی پتھ اسکیم کے خلاف بہار بند کے دوران مظاہرے شروع ہوئے۔ جہان آباد میں صبح ہوتے ہی نوجوان سڑک پر آگئے۔ شیخ پورہ نگر کے کالج موڑ پر نوجوان سڑک بلاک کر کے احتجاج کر رہے ہیں۔ بہار بند کے حامیوں نے جہان آباد کے تہہ او پی میں کھڑی بس ٹرک کو آگ لگا دی۔ اس دوران بند کے حامیوں نے پولیس پر پتھراؤ بھی کیا۔ ڈی ایم اور ایس پی جائے حادثہ پر پہنچ گئے ہیں
پرتشدد ہجوم نے پولیس پارٹی پر پتھراؤ بھی کیا جس کے نتیجے میں سب انسپکٹر رینک کا ایک افسر زخمی ہوگیا۔زخمی سب انسپکٹر کی شناخت تہہ پولیس چوکی کے انچارج دیرج کمار کے طور پر ہوئی ہے۔
تشدد کے بعد جہان آباد کے ڈی ایم اور ایس پی فوری طور پر بڑی تعداد میں پولیس اہلکاروں کے ساتھ موقع پر پہنچے اور مظاہرین کو منتشر کرنے کے لیے لاٹھی چارج کیا۔جہان آباد کے علاوہ ابھی تک کسی دوسرے اضلاع سے تشدد کی کوئی اطلاع نہیں ہے۔تشدد سے متاثرہ اضلاع کیمور، روہتاس، بھوجپور، اورنگ آباد، بکسر، نوادہ، مغربی چمپارن، سمستی پور، لکھی سرائے، بیگوسرائے، ویشالی اور سرن میں فون اور انٹرنیٹ خدمات معطل کردی گئی ہیں۔
ان اضلاع کے ساتھ ساتھ ریاستی دارالحکومت پٹنہ میں بھی بڑی تعداد میں پولیس فورس تعینات کی گئی ہے۔ریاست کی مختلف نوجوان تنظیموں کے ذریعہ بند کی کال بہار میں پچھلے تین دنوں سے جاری تشدد کے درمیان آئی تھی، جس میں کئی ریلوے املاک پر حملہ کیا گیا تھا اور انہیں تباہ کردیا گیا تھا۔جمعہ کو بھیڑ نے پٹنہ ضلع کے دانا پور ریلوے اسٹیشن کے ایک حصے کو آگ لگا دی۔
اگنی پتھ اسکیم کے خلاف احتجاج میں آج بہار بند ہے۔ اس کے پیش نظر پولیس ہیڈ کوارٹر نے مختلف اضلاع میں 45 کمپنی اضافی پولیس فورس تعینات کر دی ہے۔ پولیس ہیڈ کوارٹر نے شرپسندوں سے سختی سے نمٹنے کی ہدایت کی ہے۔
اگنی پتھ اسکیم کو لے کر جاری احتجاج کا سب سے زیادہ اثر ریلوے پر پڑا ہے۔ حاجی پور ایسٹ سنٹرل ریلوے کی 200 ٹرینیں منسوخ اس کے ساتھ ہی دانا پور ڈویژن سے 69 ٹرینیں منسوخ ہیں۔ رانچی ریلوے ڈویژن سے تقریباً نصف درجن ٹرینیں منسوخ ہیں۔
جاری احتجاج کی وجہ سے مغربی بنگال کے مختلف شہروں سے نکلنے والی 6 ٹرینیں اور بہار کے شہروں سے آنے والی 2 ٹرینیں یعنی کل 8 ٹرینیں آج 18 جون کو منسوخ کر دی گئی ہیں۔ ایسٹرن ریلوے کے سی پی آر او نے یہ اطلاع دی۔
یوپی پولس نے اگنی پتھ اسکیم کے خلاف احتجاج کرنے والوں کے خلاف سخت کارروائی شروع کردی ہے۔ اب تک 260 ملزمان کو گرفتار کیا جا چکا ہے۔ یوپی کے 6 اضلاع میں خلاف ورزی کرنے والوں کو گرفتار کیا گیا ہے۔ جس میں بلیا سے 109، متھرا سے 70، علی گڑھ سے 30، آگرہ سے 9، وارانسی کمشنریٹ سے 27 اور نوئیڈا سے 15 لوگوں کو گرفتار کیا گیا ہے۔ اس کے علاوہ بلیا کے بعد ایودھیا میں بھی دفعہ 144 نافذ کردی گئی ہے۔اگنی پتھ اسکیم کے خلاف احتجاج کرنے والوں کے خلاف یوپی میں اب تک 6 ایف آئی آر درج کی گئی ہیں
اگنی پتھ اسکیم کے خلاف احتجاج کی وجہ سے شمالی ریلوے کو آج 17 ٹرینیں منسوخ کرنی پڑیں۔ ناردرن ریلوے کے چیف پبلک ریلیشن آفیسر دیپک کمار نے کہا کہ آج (17 جون 2022 سے) شروع ہونے والی 17 ٹرینیں آپریشنل وجوہات کی بنا پر منسوخ کر دی گئی ہیں۔
وزیر دفاع راج ناتھ سنگھ اگنی پتھ بھرتی اسکیم کے سلسلے میں آج آرمی چیفس کے ساتھ میٹنگ کریں گے۔ بحریہ کے سربراہ ایڈمرل آر ہری کمار اور فضائیہ کے سربراہ ایئر چیف مارشل وویک رام چودھری وزیر دفاع کی رہائش گاہ پہنچ گئے ہیں۔
ملک میں جاری تشدد کے درمیان وزیر دفاع راج ناتھ سنگھ ایک اہم میٹنگ کرنے والے ہیں۔ اگنی پتھ اسکیم کے خلاف احتجاج کو بھی اس میٹنگ کے ایجنڈے میں شامل کیا جا سکتا ہے۔
وزارت داخلہ نے سی اے پی ایف اور آسام رائفلز میں بھرتی کے لیے اگنیوروں کے لیے 10 فیصد اسامیاں محفوظ رکھنے کا فیصلہ کیا ہے، جب کہ دونوں فورسز میں بھرتی کے لیے اگنیوروں کو عمر کی بالائی حد سے 3 سال کی چھوٹ دی گئی ہے۔ اگنیور کے پہلے بیچ کے لیے عمر کی بالائی حد سے 5 سال کی چھوٹ ہوگی۔ یہ اطلاع وزارت داخلہ نے دی ہے۔