سمستی پور:۔28؍نومبر
(زین نیوز ڈیسک)
بہار کے سمستی پور ضلع میں ایک بار پھر تیز رفتار بولیرو نے تباہی مچا دی ہے۔ روزدہ مین روڈ پر تیز رفتار بولیرو نے 15 افراد کو کچل دیا۔ اس حادثے میں 9 افراد کی حالت تشویشناک ہے۔
دیگر افراد کو بھی زیادہ چوٹیں آئی ہیں، جنہیں علاج کے لیے سمستی پور صدر ہسپتال میں داخل کرایا گیا ہے۔ اس حادثے کے بعد پورے علاقے میں افراتفری کا ماحول ہے۔ یہ تمام زخمی بھویاں بابا کی پوجا کرنے جا رہے تھے۔
بتایا جا رہا ہے کہ پیر کی صبح 50 سے زیادہ لوگ برہما اسٹھن کی طرف جا رہے تھے، اسی دوران کنہیا چوک کے قریب ایک تیز رفتار بولیرو بے قابو ہو گئی اور بھیڑ کو کچلتی ہوئی آگے بڑھ گئی۔
اس خوفناک حادثے میں 15 افراد زخمی ہوئے جن میں سے 9 کی حالت تشویشناک ہے۔ تمام زخمیوں کو علاج کے لیے اسپتال میں داخل کرایا گیا ہے۔ اس وقت تمام زخمیوں کا علاج سمستی پور کے صدر اسپتال میں جاری ہے۔ واقعہ کی اطلاع ملتے ہی پولیس موقع پر پہنچ گئی اور معاملے کی تحقیقات شروع کر دی۔
واقعے کے بعد کہرام مچ گیا۔ جلدی میں تمام زخمیوں کو صدر اسپتال لے جایا گیا۔ پولیس نے کارروائی کرتے ہوئے بولیرو کو ضبط کر لیا ہے۔ اس کے ساتھ ڈرائیور کو بھی گرفتار کر لیا گیا ہے۔ یہ تمام لوگ جیتوار پور کے رہائشی راکیش چودھری کے گھر بھویاں بابا کی پوجا میں حصہ لینے آئے تھے۔
زخمیوں کی شناخت نیتو کماری، ستیم کماری، رینا دیوی، رینا چودھری، نشا کماری اور جگدیش مہتو کے طور پر ہوئی ہے جو مفصل تھانہ علاقہ کے تحت جیتوار پور کنہائی چوک کے رہنے والے ہیں۔ جبکہ گڑیا کماری پاٹے پور، آشا دیوی سہدائی ویشالی، راجہ چودھری مہوا، امرجیت کمار تاج پور کے رہنے والے ہیں۔