دہلی ہائی کورٹ نے ایکسائز پالیسی کیس میں سابق نائب وزیر اعلی منیش سسودیا کو ضمانت دینے سے انکار کردیا۔

دہلی ہائی کورٹ نے دہلی شراب پالیسی معاملے میں سی بی آئی معاملے میں دہلی کے سابق نائب وزیر اعلی منیش سسودیا کی ضمانت کی عرضی کو مسترد کر دیا ہے۔ بنچ نے کہا کہ سسودیا کے خلاف الزامات بہت سنگین ہیں۔ وہ طاقتور شخص ہے، اگر اس کی ضمانت ہو جاتی ہے تو گواہ کے متاثر ہونے کے امکان کو رد نہیں کیا جا سکتا۔

جسٹس دنیش کمار شرما کی سنگل جج بنچ دہلی ایکسائز پالیسی 2021-22 کی تشکیل اور نفاذ میں مبینہ بے ضابطگیوں سے منسلک سنٹرل بیورو آف انوسٹی گیشن کے ذریعہ دائر کیس میں سسودیا کی طرف سے دائر ضمانت کی درخواست کی سماعت کر رہی تھی۔

حالانکہ منیش سسودیا کے وکیل نے کہا ہے کہ وہ دہلی ہائی کورٹ کے فیصلے کے خلاف سپریم کورٹ سے رجوع کریں گے۔جسٹس دنیش شرما نے کہاکہ سسوڈیا پر الزام ہے کہ شراب کی پالیسی ساؤتھ گروپ کے کہنے پر ان کو ناجائز فائدہ پہنچانے کے ارادے سے بنائی گئی تھی۔

 یہ بہت سنجیدہ معاملہ ہے۔ اس طرح کا برتاؤ سسوڈیا کی طرف سے انتہائی بدتمیزی کے مترادف ہے، کیونکہ وہ ایک عوامی ملازم تھے اور ایک اعلیٰ عہدے پر فائز تھے۔

سی بی آئی کی دلیل تھی- پارٹی کے لوگ منیش کی حمایت میں جھوٹے دعوے کر رہے ہیں۔سماعت کے دوران سی بی آئی نے منیش سسودیا کی ضمانت کی عرضی کی مخالفت کی تھی اور کہا تھا کہ سسودیا کے محکمانہ دفاتر اور نوکرشاہوں کے ساتھ قریبی تعلقات تھے۔ ان پر سسودیا کا اثر و رسوخ واضح ہے۔

 یہی نہیں اعلیٰ عہدوں پر بیٹھے ان کی پارٹی کے ساتھی تحقیقات کو متاثر کرنے کے لیے جھوٹے دعوے کر رہے ہیں۔ وہ یہ بھی کہہ رہے ہیں کہ سسودیا سیاسی انتقام کا شکار ہو گئے ہیں۔

راؤس ایونیو کورٹ تھوڑی دیر میں ای ڈی کیس کی سماعت کرے گی،منیش سسودیا کے خلاف ای ڈی کی سپلیمنٹری چارج شیٹ پر بھی آج سماعت ہوگی۔

 یہ معاملہ دہلی کی راؤس ایونیو کورٹ میں ہے۔ اطلاعات کے مطابق ای ڈی نے الزام لگایا ہے کہ سسودیا نے شراب گھوٹالہ میں رشوت کے طور پر 622 کروڑ روپے سے زیادہ کی کمائی کی۔ ای ڈی اس معاملے میں اب تک چار چارج شیٹ داخل کر چکی ہے۔ جلد ہی 5ویں چارج شیٹ بھی داخل ہونے والی ہے۔