ہندوستانی شہری کو امریکہ میں 19 سال قید کی سزا

تازہ خبر عالمی

ہندوستانی شہری کو امریکہ میں 19 سال قید کی سزا
سزا مکمل ہونے کے بعد ملک بدر کرنے کی کارروائی
نئی دہلی:۔21/نومبر
(انٹرنیٹ ڈیسک)

امریکہ کی ایک عدالت نے خالصتانی رہنما گروپتون سنگھ پنوں کے قتل کی سازش کے معاملے میں ہندوستانی شہری نکھل گپتا کو 19 سال اور 7 ماہ قید کی سزا سنائی ہے۔ 55 سالہ نکھل گپتا نے رواں سال کے اوائل میں کرائے کے قاتل کے ذریعے قتل کی سازش، قتل کی منصوبہ بندی اور منی لانڈرنگ سمیت الزامات کا اعتراف کیا تھا۔

جمعہ کو سزا سنانے کے دوران انہوں نے عدالت میں گروپتون سنگھ پنوں اور سکھ برادری سے معافی مانگتے ہوئے اپنے عمل پر افسوس کا اظہار کیا۔نیویارک کی سدرن ڈسٹرکٹ کورٹ کے جج وکٹر میریرو نے تقریباً 80 منٹ کی سماعت کے بعد فیصلہ سنایا۔ اس موقع پر نکھل گپتا نے عدالت میں تقریباً چھ منٹ تک انگریزی میں اپنا بیان دیا۔ انہوں نے مہاتما گاندھی، مدر ٹریسا، نیلسن منڈیلا اور مارٹن لوتھر کنگ کا حوالہ دیتے ہوئے کہا کہ وہ ان عظیم شخصیات کے دکھائے ہوئے راستے پر چلنا چاہتے ہیں۔

بعد ازاں پنوں کی جانب دیکھتے ہوئے انہوں نے کہا کہ وہ اپنے کیے کو تبدیل نہیں کرسکتے، تاہم پنوں، سکھ برادری اور اس سے وابستہ تمام افراد سے معافی مانگتے ہیں۔ بیان کے دوران نکھل گپتا جذباتی ہوگئے اور کہا کہ اس مقدمے کی وجہ سے ان کی بیوی، والدہ اور بچوں کو بھی مشکلات کا سامنا کرنا پڑا ہے۔دوسری جانب گروپتون سنگھ پنوں نے بھی سماعت کے دوران عدالت میں اپنا بیان دیا۔
انہوں نے کہا کہ قتل کی سازش کا انکشاف ہونے کے بعد سے وہ گزشتہ 1200 دنوں سے معمول کے مطابق اپنی قانونی پیشہ ورانہ سرگرمیاں انجام نہیں دے پارہے ہیں۔ پنوں نے تقریباً 20 منٹ تک عدالت میں اپنا موقف پیش کیا، تاہم جج نے سماعت کو آگے بڑھانے کے لیے انہیں مختصر گفتگو کرنے کی ہدایت دی۔ سماعت سے قبل پنوں کے متعدد حامی عدالت کے باہر جمع ہوئے تھے۔ ان کے ہاتھوں میں نکھل گپتا اور اس مقدمے میں ملوث دیگر افراد کے پتلے بھی موجود تھے۔

عدالت نے نکھل گپتا کو قید کی سزا مکمل ہونے کے بعد نگرانی میں رہائی دینے کا حکم نہیں دیا ہے۔ جج کے مطابق سزا پوری ہونے کے بعد انہیں امریکہ سے ملک بدر کرنے کے لیے قانونی کارروائی شروع کی جائے گی۔ نکھل گپتا کے وکلاء نے فیصلے پر مایوسی ظاہر کرتے ہوئے کہا کہ انہیں نسبتاً کم سزا کی توقع تھی۔امریکی عدالت میں پیش کی گئی دستاویزات کے مطابق، 2023 میں نکھل گپتا نے ہندوستان اور دیگر ممالک کے بعض افراد کے ساتھ مل کر پنوں کے قتل کی سازش تیار کی تھی۔

اس معاملے میں وکاس یادو کا نام بھی سامنے آیا ہے۔ امریکی استغاثہ کے مطابق، وکاس یادو کی ہدایت پر نکھل گپتا نے ایک ایسے شخص سے رابطہ کیا تھا جسے وہ مجرمانہ گروہ سے وابستہ سمجھتا تھا، تاہم وہ شخص دراصل امریکی ڈرگ انفورسمنٹ ایڈمنسٹریشن (ڈی ای اے) کا مخبر تھا۔ گپتا نے اس سے نیویارک میں پنوں کو قتل کرنے کے لیے ایک شوٹر کا انتظام کرنے کو کہا تھا۔امریکی حکام کے دعوے کے مطابق، وکاس یادو نے نکھل گپتا کے ذریعے قتل کے لیے ایک لاکھ امریکی ڈالر کی پیشکش کی تھی۔ اس سلسلے میں 9 جون 2023 کے آس پاس ایک ساتھی کے ذریعے 15 ہزار امریکی ڈالر بطور پیشگی رقم بھی فراہم کیے گئے تھے۔

اس معاملے میں وکاس یادو کو امریکہ نے اکتوبر 2024 میں ملزم نامزد کیا تھا اور ایف بی آئی نے ان کی تلاش کے لیے مطلوبہ اشتہار بھی جاری کیا تھا۔ امریکی حکام کے مطابق وہ تاحال ان کی تحویل میں نہیں ہیں اور خیال کیا جاتا ہے کہ وہ ہندوستان میں موجود ہیں۔ دسمبر 2023 میں دہلی پولیس نے انہیں اغوا اور بھتہ خوری کے ایک الگ مقدمے میں گرفتار کیا تھا، تاہم اپریل 2024 میں ضمانت ملنے کے بعد وہ جیل سے باہر آگئے۔

ہندوستانی حکومت نے واضح کیا ہے کہ وکاس یادو اب سرکاری ملازمت میں نہیں ہیں۔نکھل گپتا کو سزا سنائے جانے سے قبل امریکی استغاثہ نے عدالت میں ایک اور دعویٰ پیش کیا۔ اس کے مطابق وکاس یادو اور نکھل گپتا مئی 2023 میں نیپال یا پاکستان میں ایک دوسرے کو قتل کرنے کا منصوبہ بھی بنا رہے تھے۔ اس دعوے کی مزید تفصیلات تاحال سامنے نہیں آئی ہیں۔