بہار کا نوجوان ہنی ٹریپ میں پھنس گیا پاکستان کو بھیجی معلومات
ہنی ٹریپ کا شکار۔دفاعی معلومات بھیجی
نئی دہلی:۔27؍اگست
(زین نیوز ڈیسک)
بہار کے بھکت بنسی جھا (36) کو کولکتہ پولیس نے ہندوستان کی انٹیلی جنس معلومات پاکستانی ایجنٹ کو بھیجنے کے الزام میں گرفتار کیا ہے۔ پاکستانی انٹیلی جنس آپریٹر کے ہنی ٹریپ میں پھنس کر ملزم نوجوان ہندوستانی فوج سے متعلق حساس معلومات شیئر کر رہا تھا۔ پولیس نے اس کے پاس سے کئی دستاویزات ضبط کرلئے ہیں۔
ملزم دہلی کی ایک معروف بین الاقوامی کورئیر کمپنی میں ڈیلیوری بوائے ہے۔ کولکتہ پولیس کی اسپیشل ٹاسک فورس کو ملٹری انٹیلی جنس سے ان پٹ ملا تھا۔ 25 اگست کو پولیس نوجوان کو پوچھ گچھ کے لیے ہاوڑہ کے گھر سے لے گئی تھی۔
ایجنٹ نے خود کو نیوز اینالسٹ اور صحافی بہن بتایا تھا۔ملزم نےبتایا کہ اکتوبر 2022 میں فیس بک پر آروشی شرما نامی لڑکی سے بات چیت شروع ہوئی۔ دونوں دوست بن گئے۔ لڑکی نے بتایا کہ وہ ایک نیوز چینل میں تجزیہ کار ہے اور اس کی بہن دفاعی صحافی ہے۔
پاکستانی ایجنٹ بھارت کے نمبر پر واٹس ایپ استعمال کرتا تھا۔دونوں کے درمیان بات چیت آہستہ آہستہ بڑھتی گئی۔ نمبروں کا تبادلہ ہوا اور پھر واٹس ایپ پر متواتر گفتگو ہونے لگی۔
لڑکی انڈیا کے نمبر پر واٹس ایپ استعمال کرتی تھی۔ صحافی بہن کے کام سے متعلق معلومات اکٹھا کرنے کے نام پر، آروشی (پاک ایجنٹ) نے بھکت بنسی کو نیٹ کیمرہ نامی ایپ انسٹال کرنے کا کہا۔
ملزم نے دہلی میں فوجی اڈوں کی تصویریں بھیجی۔ایپ کلک کی گئی تصویروں کو لوکیشن کے ساتھ ٹیگ کرتی تھی۔ مارچ 2023 میں، لڑکی کے کہنے پر، بھکت بنسی نے اپنے فون پر نیٹ کیمرہ ایپ سے دہلی میں فوجی اڈوں کی کئی تصاویر لی اور بھیج دیں۔ پولیس کو ملزم کے فون سے کئی تصاویر، ویڈیوز اور آن لائن چیٹ ملی ہیں۔
ملزم کے پاس پاکستانی جاسوسوں کو پہلے سے ایکٹیویٹڈ سم کارڈ ملے۔لڑکی نےپاکستانی انٹیلی جنس ایجنسی کے ایک افسر سے بھی بھکت بنسی کے بارے میں بات کی تھی، جسے وہ اپنا باپ کہتی تھی۔ دونوں کے کہنے پر گرفتار نوجوانوں نے پہلے سے ایکٹیویٹڈ سم کارڈ اور انڈیا کے نمبر پر ایکٹیویٹ شدہ فوری میسجنگ اکاؤنٹ حاصل کرنے میں بھی مدد کی۔