جگتیال میں 27 لاکھ روپئے مالیتی 144 گمشدہ اور مسروقہ موبائل فون مالکین کے حوالے

ضلع پولیس کی جانب سے جدید ٹیکنالوجی کے استعمال سے گم شدہ اور چوری شدہ موبائل فون بازیاب کرنے کی مہم میں ایک اور بڑی کامیابی حاصل ہوئی۔ ضلع پولیس کے مرکزی دفتر میں منعقدہ تقریب میں ضلع ایس پی اشوک کمار (آئی پی ایس) نے 27 لاکھ روپے مالیت کے 144 موبائل فون اصل مالکان کو واپس کیے۔

اس موقع پر خطاب کرتے ہوئے ایس پی اشوک کمار نے کہا کہ شہری اگر اپنا موبائل فون گم یا چوری ہونے کی صورت میں فوری متعلقہ پولیس اسٹیشن میں شکایت درج کروائیں اور www.ceir.gov.in پر فراہم کردہ CEIR پورٹل پر تفصیلات درج کریں، تو فون کی بازیابی کے امکانات کئی گنا بڑھ جاتے ہیں۔ انہوں نے بتایا کہ ضلع میں اب تک 1,268 موبائل فون اس نظام کے تحت برآمد کر کے مالکان تک پہنچائے جا چکے ہیں۔

ایس پی نے کہا کہ ہر پولیس اسٹیشن میں نودل افسر تعینات کیے گئے ہیں اور انہیں خصوصی تربیت دی گئی ہے تاکہ موبائل فون ریکوری کے عمل کو تیز اور مؤثر بنایا جا سکے۔ عوام کو اس بات کا احساس ہونا چاہیے کہ گم شدہ فون پر عدم توجہ ذاتی اور سماجی سلامتی کے لیے خطرہ بن سکتی ہے، کیونکہ ان میں موجود ذاتی معلومات مجرمانہ سرگرمیوں میں استعمال ہو سکتی ہیں۔

انہوں نے مزید کہا کہ کوئی بھی شخص سیکنڈ ہینڈ موبائل خریدنے سے قبل CEIR پورٹل پر اس کا IMEI نمبر چیک کرے تاکہ یہ معلوم ہو سکے کہ وہ فون چوری شدہ یا گم شدہ تو نہیں۔ اسی طرح اگر کسی کو کوئی موبائل فون ملے تو فوری طور پر قریبی پولیس اسٹیشن یا مالک کو واپس کرنا چاہیے۔

تقریب میں آئی ٹی کور انسپکٹر رفیق خان، CEIR ٹیم کے ہیڈ کانسٹیبل محمو د اور کانسٹیبل اظہر کی خدمات کو سراہا گیا۔اس موقع پر اپنے موبائل واپس پانے والے متاثرین نے پولیس کی بروقت کارروائی اور ٹیکنالوجی کے استعمال پر خوشی اور اطمینان کا اظہار کرتے ہوئے ایس پی کا شکریہ ادا کیا۔

ایس پی نے شہریوں کو خبردار کیا کہ موجودہ دور میں سائبر مجرم نت نئے طریقوں سے عوام کو دھوکہ دے کر مالی نقصان پہنچا رہے ہیں، اس لیے ہر شخص کو ہوشیار رہنے کی ضرورت ہے۔ایس پی نے اپیل کی کہ کوئی بھی شخص اگر سائبر فراڈ کا شکار ہو جائے تو فوری طور پر 1930 سائبر کرائم ہیلپ لائن پر کال کرے یا www.cybercrime.gov.in پر شکایت درج کروائے۔

 انہوں نے درج ذیل بڑے سائبر جرائم کی نشاندہی کی جعلی ویب سائٹس یا دھوکہ دہی پر مبنی پیشکشوں کے ذریعے آن لائن خریداری میں فراڈ۔

جعلی ایپس یا افراد کی طرف سے قرض دینے کے بہانے پیسے ہتھیانا، خاص طور پر کسان اور گھریلو خواتین متاثر۔ فرضی ہیلپ لائن نمبر پر کال کر کے OTP اور بینک تفصیلات لے کر رقم چرانا۔ جعلی بروکریج پلیٹ فارمز کے ذریعے زیادہ منافع کا جھانسہ دے کر سرمایہ بٹورنا۔