ایکناتھ شنڈے کا گروپ اصلی شیوسینا، اسپیکر کا فیصلہ

مہاراشٹر کے سابق سی ایم ادھو ٹھاکرے نے اسپیکر کے فیصلے پر کہا کہ اسپیکر کا آج جو حکم آیا ہے وہ جمہوریت کا قتل ہے اور سپریم کورٹ کے فیصلے کی بھی توہین ہے۔ سپریم کورٹ نے واضح طور پر کہا تھا کہ گورنر نے اپنے عہدے کا غلط استعمال کیا ہے اور غلط فیصلہ لیا ہے۔ ہم اس جنگ کو مزید لڑیں گے اور ہمیں سپریم کورٹ پر پورا بھروسہ ہے۔

مہاراشٹر اسمبلی کے اسپیکر کی جانب سے شنڈے دھڑے کو حقیقی شیو سینا کہنے پر شیو سینا (یو بی ٹی) کے رکن پارلیمنٹ سنجے راوت نے کہاکہ آج کا فیصلہ انصاف نہیں یہ ایک سازش ہے، ہم ضرور سپریم کورٹ جائیں گے۔ عدالت میں ہماری لڑائی جاری رہے گی۔ سنجے راوت نے فیصلے کو میچ فکسنگ قرار دیا۔

شرد پوار کو امید ہے کہ ادھو گروپ کو سپریم کورٹ سے انصاف ملے گا۔مہاراشٹر اسمبلی کے اسپیکر کی جانب سے شنڈے دھڑے کو حقیقی شیو سینا کہنے پر این سی پی صدرشرد پوار نے کہاکہ اس فیصلے کے بعد اب ادھو ٹھاکرے کو سپریم کورٹ جانا پڑے گا۔ انہیں سپریم کورٹ سے انصاف ملنے کی امید ہے۔ امباداس دانوے نے کہا کہ ہم سپریم کورٹ جائیں گے اور اس فیصلے کو چیلنج کریں گے۔

مرکزی وزیر رام داس اٹھاولے نے کہا کہ مہاراشٹر اسمبلی کے اسپیکر نے جو فیصلہ دیا ہے وہ اصول اور قانون کے مطابق ہے۔ ایکناتھ شنڈے کے پاس 2/3 اکثریت کے ذریعے 37 ایم ایل اے ہیں، اس لیے الیکشن کمیشن نے بھی شندے کی شیو سینا کو ہی اصل دھڑا سمجھا۔ ادھو ٹھاکرے کو بڑا جھٹکا لگا ہے۔