دی کیرالہ اسٹوری ۔ فلم میں دکھائے گئے حقائق غلط‘اور گمراہ کن۔اسکریننگ کی اجازت نہیں دی جانی چاہئے

لو جہاد پر بنی فلم دی کیرالہ سٹوری پر تنازعہ بڑھتا جا رہا ہے۔ اب کیرالہ قانون ساز اسمبلی میں اپوزیشن لیڈر وی ڈی ستیسان نے کہا ہے کہ ریاست میں ایسا کچھ نہیں ہوا ہے۔ فلم میں دکھائے گئے حقائق غلط ہیں۔

ریاست کی شبیہ کو خراب کرنے کی کوشش کی جا رہی ہے۔ کیرالہ میں نفرت کے بیج بونا سنگھ کا ایجنڈا ہے۔ دوسری جانب فلمسازوں کا دعویٰ ہے کہ فلم سچے واقعات پر مبنی ہے۔

حال ہی میں The Kerala Story کا ٹریلر جاری کیا گیا تھا۔ یہ فلم کیرالہ میں 32000 خواتین کے اچانک لاپتہ ہونے کی کہانی ہے۔ ٹریلر میں دکھایا گیا ہے کہ دہشت گرد تنظیم۔ آئی ایس آئی ایس ان خواتین کو برین واش کرتی ہے اور انہیں ہندوستان میں مختلف دہشت گردی کے مشن انجام دینے کی تربیت دے کر مشن پر بھیجتی ہے۔

کانگریس لیڈر ستھیسن نےاے این آئی کو بتایا، ‘میں نے فلم کا ٹریلر دیکھا اور یہ گمراہ کن ہے۔ اس فلم کے ذریعے کیرالہ کی 32000 لڑکیوں کے داعش میں شامل ہونے کے بارے میں غلط معلومات پھیلائی جا رہی ہیں۔

 کیرالہ میں نفرت کے بیج بونا سنگھ پریوار کا ایجنڈا ہے۔ سنگھ پریوار لوگوں کو تقسیم کرنا چاہتا ہے۔ ہمارے دلوں میں نفرت پیدا کرنا چاہتا ہے۔ اس فلم کو ریلیز نہیں ہونے دینا چاہیے۔

ستھیسن نے یہاں ایک بیان میں کہا کہ فلم کا ٹریلر ہی بتاتا ہے کہ فلم کیا کہنا چاہ رہی ہے۔ "یہ اظہار رائے کی آزادی کا مسئلہ نہیں ہے بلکہ اقلیتی گروہوں پر الزامات لگا کر سماج میں تقسیم پیدا کرنے کے سنگھ پریوار کے ایجنڈے کو نافذ کرنے کی کوشش کا حصہ ہے۔”

ساتھیسن نے مزید کہا، ‘اس فلم کی ریلیز کا مطلب پوری دنیا کے سامنے کیرالہ کی تذلیل ہے۔ وہ کس بنیاد پر کہہ رہے ہیں کہ کیرالہ سے لاپتہ ہونے والی 32000 خواتین آئی ایس آئی ایس میں شامل ہو چکی ہیں؟

کیا وہ ایسی کسی عورت کا نام بھی لے سکتا ہے؟ این آئی اے نے سپریم کورٹ میں پیش کی گئی اپنی رپورٹ میں کہا ہے کہ یہاں ایسا کوئی معاملہ سامنے نہیں آیا ہے۔