یوگی حکومت کا مذہبی مقامات سے غیر قانونی لاؤڈ اسپیکر ہٹانے کا حکم

تلنگانہ قومی
زین نیوز

 صوتی آلودگی میں ہائی کورٹ کے فیصلہ کی تعمیل۔حکام

لکھنو:26؍اپریل
(اے ایم این ایس)
ملک میں مذہبی مقامات پر نصب لاؤڈ اسپیکر کو لیکر سیاست گرم ہے۔ ساتھ ہی اتر پردیش حکومت نے ریاست میں مذہبی مقامات سے غیر قانونی لاؤڈ اسپیکرز کو ہٹانے کا حکم دیا ہے۔ دریں اثنا، یوپی کے ایڈیشنل چیف سکریٹری اونیش اوستھی نے تمام اسٹیشن انچارجوں سے مذہبی مقامات پر نصب غیر قانونی لاؤڈ اسپیکرز کو ہٹانے کے بارے میں رپورٹ طلب کی ہے۔ یہ رپورٹ 30 اپریل تک پیش کرنے کو کہا گیا ہے۔ مقررہ مدت میں رپورٹ پیش نہ کرنے پر کارروائی کی جائے گی۔

دوسری جانب یوپی پولیس نے دعویٰ کیا ہے کہ مذہبی مقامات سے 125 لاؤڈ اسپیکر ہٹا دیے گئے ہیں۔ ساتھ ہی 17000 اسپیکرز کی آواز رضاکارانہ طور پر کم کر دی گئی ہے۔ پیر کو معلومات دیتے ہوئے یوپی کے اے ڈی جی پرشانت کمار نے کہا کہ "ہم نے تقریباً 125 لاؤڈ اسپیکرز کو نیچے کر دیا ہے اور لوگوں نے رضاکارانہ طور پر تقریباً 17,000 اسپیکرز کی آواز کو کم کر دیا ہے۔

جمعۃ الوداع کی نماز کے لیے حساس اضلاع میں خصوصی انتظامات کیے گئے ہیں۔” ساتھ ہی انہوں نے کہا کہ کوئی بھی تہوار ہو اسے روایتی طریقے سے منانا چاہیے۔ صوتی آلودگی میں ہائی کورٹ کے فیصلے کی تعمیل ہے۔

آنے والے دنوں میں کئی اہم مذہبی تہواروں کے پیش نظر وزیر اعلیٰ یوگی آدتیہ ناتھ نے ہدایت دی تھی کہ تہواروں کے دوران مائیک کا استعمال کیا جا سکتا ہے، لیکن اس بات کو یقینی بنایا جائے کہ مائیک کی آواز اس احاطہ سے باہر نہ جائے۔ انہوں نے تاکید کی تھی کہ دوسرے لوگوں کو کوئی تکلیف نہیں ہونی چاہئے اور نئی تقریبات اور نئی جگہوں پر مائکس لگانے کی اجازت نہیں ہونی چاہئے۔ یوگی نے کہا تھا کہ بغیر اجازت کے جلوس/مذہبی جلوس نہیں نکالا جانا چاہئے اور اجازت دینے سے پہلے منتظم سے امن اور ہم آہنگی کو برقرار رکھنے کے بارے میں حلف نامہ لینا چاہئے